Covid 19 | രാജ്യത്ത് കോവിഡ് കേസുകള്‍ വീണ്ടും ഉയരുന്നു; ആകെ രോഗബാധിതർ 91 ലക്ഷത്തിലേക്ക്

ന്യൂഡൽഹി: രാജ്യത്ത് ഒരിടവേളയ്ക്ക് ശേഷം കോവിഡ് കേസുകള്‍ വീണ്ടും ഉയരുന്നു. കഴിഞ്ഞ ഇരുപത്തിനാല് മണിക്കൂറിനിടെ 45,209 പേർക്കാണ് പുതിയതായി രോഗം സ്ഥിരീകരിച്ചത്. ഇതോടെ രാജ്യത്തെ ആകെ കോവിഡ് ബാധിതരുടെ എണ്ണം 90,95,807 ആയി ഉയർന്നിരിക്കുകയാണ്.

ആരോഗ്യ കുടുംബക്ഷേമ മന്ത്രാലയം പുറത്തുവിട്ട കണക്കുകള്‍ അനുസരിച്ച് ഇതിൽ 85,21,617 പേർ രോഗമുക്തി നേടിയിട്ടുണ്ട്. 4.4ലക്ഷം സജീവ കേസുകളാണ് നിലവിലുള്ളത്.

കഴിഞ്ഞ ദിവസം മാത്രം 43,493 പേരാണ് രോഗമുക്തരായി വീടുകളിലേക്ക് മടങ്ങിയത്. രോഗമുക്തി നിരക്കും ഉയരുന്നുണ്ടെങ്കിലും പ്രതിദിന രോഗികളുടെ എണ്ണം കൂടിയത് ആശങ്ക ഉയർത്തിയിരിക്കുകയാണ്. 

മരണനിരക്കും മറ്റ് രാജ്യങ്ങളെ അപേക്ഷിച്ച് വളരെ കുറവാണെന്നത് രാജ്യത്തിന് ആശ്വാസം പകരുന്നുണ്ട്. കഴിഞ്ഞ 24 മണിക്കൂറിനിടെ റിപ്പോർട്ട് ചെയ്യപ്പെട്ട 501 മരണങ്ങൾ ഉൾപ്പെടെ ആകെ 1,33,227 കോവിഡ് മരണങ്ങളാണ് ഇന്ത്യയിൽ ഇതുവരെ റിപ്പോർട്ട് ചെയ്യപ്പെട്ടിരിക്കുന്നത്.

രോഗപരിശോധനകളും വിട്ടുവീഴ്ചയില്ലാതെ തന്നെ തുടരുന്നുണ്ട്. ഇന്ത്യൻ കൗൺസില്‍ ഓഫ് മെഡിക്കൽ റിസർച്ചിന്‍റെ കണക്കുകള്‍ അനുസരിച്ച് ഇതുവരെ 13,17,33,134 സാമ്പിൾ പരിശോധനകളാണ് രാജ്യത്ത് നടത്തിയിട്ടുള്ളത്. കഴിഞ്ഞ ദിവസം മാത്രം പതിനൊന്നുലക്ഷത്തോളം പേര്‍ക്ക് പരിശോധന നടത്തിയിരുന്നു.