കോവിഡ് 19 ; രാജ്യത്തിന് മാതൃകയായി കണ്ണൂർ ഗവൺമെൻറ് മെഡിക്കൽ കോളജ്

കോവിഡ് 19 ചികിത്സയിൽ രാജ്യത്തിന് മാതൃകയാവുകയാണ് കണ്ണൂർ ഗവ.മെഡിക്കൽ കോളജ് . ഇതുവരെ 14 കോവിഡ് പോസിറ്റീവ് രോഗികൾ ആണ് ഗവ മെഡിക്കൽ കോളേജിൽ നിന്ന് സുഖം പ്രാപിച്ചത്. ഇന്ന് കോവിഡ് ബാധിച്ച ഗർഭിണിയായ യുവതിയും , അവരുടെ രണ്ട് വയസുള്ള കുട്ടിയും , യുവതിയുടെ ഉമ്മയുമാണ് ഗവ മെഡിക്കൽ കോളജിൽ നിന്ന് രോഗവിമുക്തി നേടിയത് . ഇവരെ കൂടാതെ മറ്റൊരു യുവതിയുടെ രോഗവും ഭേദമായിട്ടുണ്ട്.

ഗർഭിണിയായ വേറൊരു യുവതിയും ഭർത്താവും അടക്കം ഒരേ ദിവസം ആറ് കോവിഡ് പോസിറ്റീവ് രോഗികൾ ആണ് ഗവ മെഡിക്കൽ കോളജിൽ നിന്ന് രോഗവിമുക്തരായത്. എന്നാൽ ഗർഭിണിയായ യുവതിയും ഭർത്താവും ആശുപത്രിയിൽ തന്നെ തുടരുകയാണ്. പ്രസവം അടുത്തത് കൊണ്ടുകൂടിയാണ് ഡോക്ടർ മാരുടെ നിർദ്ദേശപ്രകാരം ഇങ്ങനെ തീരുമാനിച്ചത്.

മാർച്ച് 20നു രാത്രി കാസർകോട് ജില്ലാ ആശുപത്രിയിൽ നിന്നാണ്‌ ഇവരെ കോവിഡ് പോസിറ്റീവ് ആണ് എന്ന് കണ്ടെത്തിയത്. ഉടൻ തന്നെ കണ്ണൂർ ഗവ. മെഡിക്കൽ കോളജിലേക്ക് മാറ്റുകയും ചെയ്തു. ഗർഭിണികൾക്കും അതിൽ ഒരു യുവതിയുടെ രണ്ടു വയസ്സിനടുത്തു പ്രായമുള്ള മകനും അടക്കമുള്ള എല്ലാ രോഗികൾക്കും കമ്മ്യൂണിറ്റി കിച്ചൻ മുഖേന ഭക്ഷണവും മറ്റ് അത്യാവശ്യം വേണ്ട സാധനങ്ങളും നൽകി.

ഗൈനക്കോളജി വിഭാഗം മേധാവി ഡോ.അജിത്തിന്റെ നേതൃതിലുള്ള ഡോക്ടർമാർ ഗർഭിണികളായ രോഗികളുടെ സ്ഥിതിഗതികൾ അപ്പപ്പോൾ തന്നെ വിലയിരുത്തി. മെഡിക്കൽ കോളേജിലെ ഡോക്ടർമാർ, നഴ്സുമാർ തുടങ്ങി എല്ലാ വിഭാഗം ജീവനക്കാർക്കും തങ്ങളുടെ നന്ദിയും സ്നേഹവും രേഖപ്പെടുത്തിയാണ് ഡിസ്ചാർജായവർ ആശുപത്രി വിട്ടത്.

മെഡിക്കൽ കോളജ് പ്രിൻസിപ്പൽ ഡോ.എൻ.റോയ്, മെഡിക്കൽ സൂപ്രണ്ട് ഡോ.സുദീപ് എന്നിവർ കണിക്കൊന്ന പൂക്കളും മധുരപലഹാരങ്ങളും കൊച്ചു മിടുക്കന് കളിക്കാൻ കളിപ്പാട്ടങ്ങളും നൽകിയാണ് യാത്രയാക്കിയത്.