തമിഴ്നാട്ടിൽ അഞ്ചു നഗരങ്ങൾ സമ്പൂർണ ലോക്ക്ഡൌണിലേക്ക്; സാധനങ്ങൾ വാങ്ങിക്കൂട്ടാൻ തിരക്കുകൂട്ടുന്നതിനിടെ സാമൂഹിക അകലം പാലിക്കാതെ ജനങ്ങൾ

ചെന്നൈ: തമിഴ്നാട്ടിലെ അഞ്ച് നഗരങ്ങളിൽ ലോക്ക്ഡൌൺ നടപടികൾ കർക്കശമാക്കാൻ സംസ്ഥാന സർക്കാർ തീരുമാനിച്ചു. ഇതോടെ സാമൂഹിക അകലം പാലിക്കാതെ സാധനങ്ങൾ വാങ്ങിക്കൂട്ടാനായി ജനങ്ങൾ കൂട്ടത്തോടെ പുറത്തിറങ്ങിയത് ആശങ്കയുണ്ടാക്കി. ചെന്നൈ, മധുര, കോയമ്പത്തൂർ, തിരുപ്പൂർ, സേലം എന്നി നഗരങ്ങളിലാണ് സർക്കാർ സമ്പൂർണ ലോക്ക്ഡൌൺ പ്രഖ്യാപിച്ചത്.

ഈ പ്രദേശങ്ങളിൽ കൂടുതൽ കോവിഡ് കേസുകൾ റിപ്പോർട്ട് ചെയ്യുന്ന മേഖലകൾ ഇതിനോടകം ഹോട്ട്സ്പോട്ടുകളാണ്.

ഞായറാഴ്ച രാവിലെ മുതലാണ് ലോക്ക്ഡൌൺ കൂടുതൽ കർക്കശമാക്കാൻ സംസ്ഥാന സർക്കാർ തീരുമാനിച്ചത്. ബുധനാഴ്ച വൈകിട്ട് വരെ നിയന്ത്രണം തുടരും. സേലത്തിനും തിരുപ്പൂരിനും ലോക്ക്ഡൌണിൽ ഒരു ദിവസം ഇളവ് നൽകിയിട്ടുണ്ട്. ഈ അഞ്ച് നഗരങ്ങളിലായി ഇതുവരെ 725 പോസിറ്റീവ് കേസുകൾ റിപ്പോർട്ട് ചെയ്തിട്ടുണ്ട്.

കൊറോണ വൈറസ് വ്യാപനം നഗരങ്ങളിൽ നിയന്ത്രണാതീതമാണെന്ന് മുഖ്യമന്ത്രി എടപ്പടി കെ പളനിസ്വാമി പറഞ്ഞു. ഇതുകൊണ്ടാണ് നിയന്ത്രണങ്ങൾ ശക്തമാക്കാൻ നിർബന്ധിതമായതെന്ന് അദ്ദേഹം പറഞ്ഞു.

ആശുപത്രികൾ, ആംബുലൻസുകൾ തുടങ്ങിയ അവശ്യ മെഡിക്കൽ സേവനങ്ങളും ഈ പ്രദേശങ്ങളിൽ തുടർന്നും പ്രവർത്തിക്കുന്ന ഡയഗ്നോസ്റ്റിക് സെന്ററുകൾക്കും സർക്കാർ ഇളവ് നൽകിയിട്ടുണ്ട്. സ്വിഗ്ഗി, സൊമാറ്റോ തുടങ്ങിയ കമ്പനികൾ നൽകുന്ന ഭക്ഷണ ഡെലിവറി സേവനങ്ങൾക്കും പ്രവർത്തനാനുമതി ഉണ്ടാകും, എന്നാൽ ഒറ്റപ്പെട്ട പലചരക്ക് കടകളും നിലവിൽ പ്രവർത്തിക്കുന്ന ബേക്കറികളും അടയ്‌ക്കേണ്ടി വരും.

കോയാംബെഡു മാർക്കറ്റ് ഉൾപ്പെടെ ലൈസൻസുള്ള മൊത്ത പച്ചക്കറി വിപണികൾ, സബ്‌സിഡിയുള്ള ‘അമ്മ കാന്റീനുകൾ’ തുടങ്ങി സർക്കാർ അംഗീകൃത പച്ചക്കറി കടകൾ പ്രവർത്തിപ്പിക്കാൻ അനുവദിക്കുമെന്ന് സർക്കാർ അറിയിച്ചിട്ടുണ്ട്.

എന്നാൽ സമ്പൂർണ ലോക്ക്ഡൌൺ പ്രഖ്യാപിച്ച വിവരമറിഞ്ഞതോടെ ഈ അഞ്ച് നഗരങ്ങളിലും താമസിക്കുന്നവർ കൂട്ടത്തോടെ സാധനങ്ങൾ വാങ്ങിക്കൂട്ടാൻ പുറത്തിറങ്ങിയത് ആശങ്കയുളവാക്കുന്നുണ്ട്.

നഗരത്തിലെ പ്രധാനകേന്ദ്രങ്ങളിലെല്ലാം രാവിലെ മുതൽ വൻ തിരക്ക് അനുഭവപ്പെടുന്നുണ്ട്. രോഗം കൂടുതലായി റിപ്പോർട്ട് ചെയ്ത പ്രദേശങ്ങളിലും തിരക്ക് അനുഭവപ്പെടുന്നത് കോവിഡ് വ്യാപനത്തിന് കാരണമാകുമോയെന്ന ആശങ്ക അധികൃതർ പ്രകടിപ്പിക്കുന്നു.

ശനിയാഴ്ച ഉച്ചകഴിഞ്ഞ് 3 മണി വരെയാണ് കടകൾ തുറന്നത്. മാർക്കറ്റുകൾ, സൂപ്പർമാർക്കറ്റുകൾ, പലചരക്ക് കടകൾ എന്നിവയിലുടനീളം, സാമൂഹിക അകലം പാലിക്കൽ മാനദണ്ഡങ്ങൾ ലംഘിക്കപ്പെട്ടു. ഏപ്രിൽ 26 മുതൽ നാല് ദിവസത്തേക്ക് പൂർണ്ണമായി പൂട്ടുന്ന വിവരമറിഞ്ഞാണ് ജനങ്ങൾ കൂട്ടത്തോടെ പുറത്തിറങ്ങിയത്.

ഈ മുനിസിപ്പാലിറ്റികളിലെ കണ്ടെയ്നർ സോണുകളിൽ കടുത്ത അണുനാശിനി പ്രയോഗം നടത്തുന്നുണ്ട്. ദിവസത്തിൽ രണ്ടുതവണയാണ് എല്ലാ കണ്ടെയ്നർ സോണുകളും അണുവിമുക്തമാക്കുന്നുണ്ട്. ലോക്ക്ഡൗൺ നിയമലംഘകർക്കെതിരെ കർശന നടപടികൾ സ്വീകരിക്കുമെന്ന് സർക്കാർ മുന്നറിയിപ്പ് നൽകിയിട്ടുണ്ട്.