സർക്കാർ, സ്വകാര്യ ലാബുകൾ കോവിഡ് 19 പരിശോധന സൗജന്യമാക്കണം; സുപ്രീംകോടതി

ന്യൂഡല്‍ഹി: രാജ്യത്തെ സർക്കാർ, സ്വകാര്യ ലാബുകളിൽ കോവിഡ്-19 പരിശോധന സൗജന്യമായി നടക്കുന്നുവെന്ന് കേന്ദ്രസർക്കാർ ഉറപ്പുവരുത്തണമെന്ന് സുപ്രീം കോടതി.

കൊറോണ വ്യാപനം തുടരുന്ന സാഹചര്യത്തിലാണ് കോടതി ഇക്കാര്യം നിർദേശിച്ചത്. അഭിഭാഷകനായ ശശാങ്ക് ദിയോ സുധിയാണ് ഇതുസംബന്ധിച്ച് പരാതി നൽകിയത്. ഇത് പരിഗണിക്കവെയാണ് കോടതി ഇക്കാര്യം വ്യക്തമാക്കിയത്.

ഇതുമായി ബന്ധപ്പെട്ട് കേന്ദ്ര സർക്കാർ അടിയന്തര നടപടി സ്വീകരിക്കണമെന്ന് കോടതി വ്യക്തമാക്കി. രാജ്യം പ്രതിസന്ധി നേരിടുന്ന സമയത്ത് ജീവകാരുണ്യ സേവനങ്ങൾ വ്യാപിപ്പിച്ച് രോഗവ്യാപനത്തിന്റെ തോത് കുറയ്ക്കുന്നതിൽ സ്വകാര്യ ആശുപത്രികൾക്കും ലാബുകൾക്കും പങ്കുണ്ടെന്ന് കോടതി പറഞ്ഞു.

എന്‍.എ.ബി.എല്‍ അംഗീകാരമുള്ളതോ ഡബ്ല്യൂ.എച്ച്.ഓ അല്ലെങ്കില്‍ ഐ.സി.എം.ആര്‍ അംഗീകരിച്ചിട്ടുള്ളതോ ആയ ലാബുകളില്‍ മാത്രമേ കോവിഡ് പരിശോധന നടത്താവൂ എന്നും സുപ്രീംകോടതി പറഞ്ഞു. അശോക് ഭൂഷൺ, എസ് രവീന്ദ്ര ഭട്ട് എന്നിവരുടെ ബഞ്ചാണ് ഉത്തരവിട്ടത്. വീഡിയോ കോൺഫറൻസിംഗിലൂടെയായിരുന്നു കോടതി നടപടികൾ.

മാർച്ച് 11 ന് ലോകാരോഗ്യ സംഘടന കോവിഡ് -19 മഹാമാരിയായി പ്രഖ്യാപിക്കുന്നതിനു മുമ്പുതന്നെ ഇത് പല രാജ്യങ്ങളിലും പടർന്നിരുന്നുവെന്നും നിലവിൽ 200 ലധികം രാജ്യങ്ങളെ ഈ പകർച്ചവ്യാധി ബാധിച്ചതായും കോടതി പറഞ്ഞു.

രാജ്യം കോവിഡ്-19 എന്ന ദേശീയ ദുരന്തം നേരിടുന്ന സാഹചര്യത്തിൽ 4500 രൂപ വരെ കോവിഡ് പരിശോധനയ്‍ക്ക് ഈടാക്കുന്നത് രാജ്യത്തെ വലിയൊരു ജനവിഭാഗത്തിന്റെ കഴിവിന്റെ പരിധിയിൽ വരില്ലെന്നും പണം ഇല്ലാത്തതിന്റെ പേരിൽ പരിശോധനയിൽ നിന്നും ഒരാളും ഒഴിവാക്കപ്പെടരുതെന്നും കോടതി നിരീക്ഷിച്ചു.

ബെഞ്ച് കേന്ദ്രത്തിന് നോട്ടീസ് നൽകുകയും രണ്ടാഴ്ചയ്ക്കുള്ളിൽ പ്രതികരണം തേടുകയും ചെയ്തു. കോവിഡ് പരിശോധന സൗജന്യമായി ചെയ്യുന്നതിൽ സ്വകാര്യ ലാബുകൾക്കുണ്ടാവുന്ന നഷ്ടം സർക്കാർ ഇടപെട്ട് നികത്തുന്നതിനെ കുറിച്ച് പിന്നീട് ആലോചിക്കാമെന്ന് ബെഞ്ച് വ്യക്തമാക്കി.

കോവിഡ്19 സ്‌ക്രീനിംഗിനും സ്ഥിരീകരണത്തിനുമായി 4,500 രൂപ നിശ്ചയിച്ചു കൊണ്ടുള്ള ഇന്ത്യൻ കൗൺസിൽ ഓഫ് മെഡിക്കൽ റിസർച്ച് ഡിപ്പാർട്ട്‌മെന്റ് ഓഫ് ഹെൽത്ത് റിസർച്ച് പുറത്തിറക്കിയ മാർച്ച് 17 ലെ നിർദേശത്തെയും പൊതുതാൽപര്യ ഹർജി ചോദ്യം ചെയ്യുന്നുണ്ട്.