COVID 19| ആശങ്കയിൽ തമിഴ്നാട്; ഇന്നുമാത്രം 110 പുതിയ രോഗബാധിതർ; എല്ലാവരും ഡൽഹിയിലെ മതസമ്മേളനവുമായി ബന്ധമുള്ളവർ

തമിഴ്നാട്ടിൽ ഇന്നു മാത്രം റിപ്പോർട്ട് ചെയ്തത് 110 പുതിയ കൊറോണ കേസുകൾ. ഇവരെല്ലാവരും ഡൽഹി നിസാമൂദ്ദീനിലെ തബ് ലീഗ് ജമാഅത്തുമായി ബന്ധമുള്ളവരാണ്. ഇതോടെ മതസമ്മേളനത്തിൽ പങ്കെടുത്ത 190 പേർക്ക് രോഗബാധ സ്ഥിരീകരിച്ചു.

സംസ്ഥാനത്ത് ഒരു ദിവസം ഇത്രയധികം പേർക്ക് രോഗം സ്ഥിരീകരിക്കുന്നത് ഇതാദ്യമാണ്. ഇതോടെ തമിഴ്നാട്ടിലെ ആകെ കോവിഡ് ബാധതരുടെ എണ്ണം 234 ആയി ഉയർന്നു.

1103 പേരെയാണ് രോഗലക്ഷണങ്ങളോടെ കണ്ടെത്തിയത്. ഇതിൽ 658 പേരുടെ സാമ്പിൾ പരിശോധനക്ക് അയച്ചു. 19 ജില്ലകളിലായാണ് പുതിയ കൊറോണ കേസുകൾ റിപ്പോർട്ട് ചെയ്തത്.

കോയമ്പത്തൂർ ജില്ലയിൽ മാത്രം 28 പുതിയ കേസുകളാണ് റിപ്പോർട്ട് ചെയ്തത്. തേനി ജില്ലയിൽ 20ഉം ദിണ്ടുഗൽ ജില്ലയിൽ 17 കേസുകളും റിപ്പോർട്ട് ചെയ്തു.

ചൊവ്വാഴ്ച ഡൽഹിയിലെ മതസമ്മേളനവുമായി ബന്ധമുള്ളവരടക്കം 57 പേർക്ക് രോഗബാധ സ്ഥിരീകരിച്ചിരുന്നു.