Covid 19 Vaccines | വാക്സിൻ എന്നു വരും? ആഗോള വാക്സിൻ പരീക്ഷണങ്ങളുടെ കേന്ദ്രമായി ഹൈദരാബാദ്

കോവിഡ് 19ന് എതിരായ പ്രതിരോധ വാക്സിൻ വികസിപ്പിക്കാനുള്ള ശ്രമത്തിലാണ് ആഗോള മരുന്നു നിർമ്മാതാക്കൾ. ഭൂരിഭാഗം വാക്സിനുകളും മനുഷ്യരിൽ പരീക്ഷിക്കുന്ന ഘട്ടത്തിലാണ്. ഈ വർഷത്തോടെ കോവിഡ് വാക്സിൻ പുറത്തിറക്കാനാണ് മിക്കവരുടെയും ശ്രമം. ഈ ഘട്ടത്തിൽ ആഗോള വാക്സിൻ പരീക്ഷണങ്ങളുടെയും നിർമ്മാതാക്കളുടെയും ഇന്ത്യയിലെ കേന്ദ്രമായി ഹൈദരാബാദ് മാറിയിരിക്കുന്നു. ആഗോളതലത്തിൽ വികസിപ്പിച്ചുകൊണ്ടിരിക്കുന്ന 60 ശതമാനം വാക്സിൻ കമ്പനികളുടെയും ഇന്ത്യയിലെ ആസ്ഥാനം ഹൈദരാബാദാണ്.

രാജ്യത്തെ ആദ്യ കോവിഡ് -19 വാക്സിനായ- കോവാക്സിൻ, റഷ്യയുടെ സ്പുട്‌നിക് വി, ജോൺസൺ & ജോൺസന്റെ Ad26.Cov2.S, ഫ്ലൂജെന്റെ കൊറോഫ്ലു അഥവാ സനോഫിസ് വാക്സിൻ എന്നിവയ്ക്കെല്ലാം ഹൈദരാബാദുമായി ബന്ധമുണ്ട്.

'കോവിഡ് -19 നുള്ള ഒരു വാക്സിൻ ഇതുവരെ ഇന്ത്യയിൽ വികസിപ്പിച്ചെടുത്തിട്ടില്ല. എന്നാൽ പരീക്ഷണങ്ങൾ പുരോഗമിക്കുന്നു. അതുപോലെ ലോകത്തെ മറ്റു രാജ്യങ്ങൾ വികസിപ്പിച്ചുകൊണ്ടിരിക്കുന്ന വാക്സിനുകളുമുണ്ട്. ഇവയ്ക്കെല്ലാം പ്രിയപ്പെട്ട നഗരമാണ് ഹൈദരാബാദ്'- ശാന്ത ബയോടെക്നിക്സ് ലിമിറ്റഡ് സ്ഥാപകൻ ഡോ. വരപ്രസാദ് റെഡ്ഡി പറഞ്ഞു.

“എല്ലാ വാക്സിൻ കമ്പനികളും നിർമ്മാണ സാങ്കേതികവിദ്യയിൽ കരുത്തുറ്റവരാണ്, കൂടാതെ നല്ല നിലവാരത്തിൽ ദശലക്ഷക്കണക്കിന് ഡോസുകൾ നിർമ്മിക്കാനുള്ള ശേഷിയുമുണ്ട്. അവയുടെ ഇന്ത്യയിലെ പ്രവർത്തനങ്ങളെല്ലാം ഹൈദരാബാദ് കേന്ദ്രീകരിച്ചാണ്” വരപ്രസാദ് റെഡ്ഡി ടൈംസ് ഓഫ് ഇന്ത്യയോട് പറഞ്ഞു. 2021 ന്റെ ആദ്യ പകുതിയിൽ റെഡ്ഡി സനോഫിയുടെ സ്വന്തം വാക്സിൻ മത്സരാർഥിയായി കാത്തിരിക്കുകയാണ്, ഇത് പ്രധാനമായും ഹൈദരാബാദിൽ നിർമ്മിക്കുമെന്നും അദ്ദേഹം പറഞ്ഞു.

ഹൈദരാബാദ് കോവിഡ് വാക്സിനുകളെ സംബന്ധിച്ച് സുപ്രധാന കേന്ദ്രമാണെന്ന് ബയോളജിക്കൽ ഇ ലിമിറ്റഡിന്റെ മാനേജിംഗ് ഡയറക്ടർ മഹിമ ദത്ല പറയുന്നു. ജോൺസൺ ആന്റ് ജോൺസന്റെ വാക്സിൻ ഹൈദരാബാദിൽ നിർമ്മിക്കുന്നതിനായി സ്വന്തമായി സാങ്കേതിക സഹകരണവും വികസിപ്പിക്കുകയാണ് അവരുടെ കമ്പനി.

ആവശ്യമായ അടിസ്ഥാന സൌകര്യങ്ങളില്ലാത്ത അക്കാദമിക് ലബോറട്ടറികളും വാക്സിൻ ഇതര കമ്പനികളും വികസിപ്പിച്ചെടുക്കുന്ന കോവിഡ് -19 വാക്സിൻ മത്സരാർഥികളിൽ ഭൂരിഭാഗവും ഇന്ത്യയുമായോ ചൈനയുമായോ പങ്കാളികളാകുകയല്ലാതെ മറ്റ് മാർഗമില്ലെന്ന് വിദഗ്ദ്ധർ അഭിപ്രായപ്പെടുന്നു.

റിപ്പോർട്ടുകൾ പ്രകാരം, ഹൈദരാബാദിലെ വാക്സിൻ നിർമ്മാതാക്കൾ ഉൽ‌പാദന സഹകരണത്തിനായി അനൌ പചാരികമായി ചർച്ച ചെയ്യുന്നു, അതിനാൽ ഒരു കമ്പനി വാക്സിൻ പരീക്ഷണത്തിൽ വിജയിച്ചാൽ അവർക്ക് മരുന്ന് വ്യാവസായികാടിസ്ഥാനത്തിൽ നിർമ്മിക്കാൻ ഹൈദരാബാദിനെ തെരഞ്ഞെടുക്കാം.

വാക്സിൻ നിർമാണ കമ്പനിയായ ഇന്ത്യൻ ഇമ്മ്യൂണോളജിക്കൽ ലിമിറ്റഡിന് പുതിയതായി 20 ദശലക്ഷം സിംഗിൾ ഡോസ് ഉൽപാദന ശേഷിയുണ്ട്. ഇതിനുള്ള പ്ലാന്‍റ് ഹൈദരാബാദിനു സമീപത്തുള്ള ജീനോം വാലിയിൽ വരുന്നുണ്ട്. സ്പുട്‌നിക് വി നിർമ്മിക്കുന്നതിനായി കമ്പനി ഇതിനകം റഷ്യൻ കമ്പനിയുമായി ചർച്ച നടത്തിവരികയാണ്.