Covid 19 | ഏതൊക്കെ സംസ്ഥാനങ്ങളാണ് കേരളത്തിൽനിന്നുള്ളവർക്ക് വിലക്ക് ഏർപ്പെടുത്തിയിരിക്കുന്നത്?

തിരുവനന്തപുരം; കോവിഡ് വ്യാപനം രൂക്ഷമാകുന്ന പശ്ചാത്തലത്തിൽ കേരളത്തിൽ നിന്നുള്ള യാത്രക്കാർക്ക് പരിശോധനകളും നിയന്ത്രണങ്ങളും ചില സംസ്ഥാനങ്ങൾ കർക്കശമാക്കി. തമിഴ്നാട്, കർണാടകം, പശ്ചിമബംഗാൾ, മഹാരാഷ്ട്ര ഉൾപ്പടെയുള്ള സംസ്ഥാനങ്ങളാണ് നിയന്ത്രണങ്ങൾ കടുപ്പിച്ചത്. കേരള അതിർത്തി കർണാടക അടച്ചതും ഇതിനിടെ വിവാദമായിരുന്നു. കേരളത്തിൽ നിന്നുള്ള യാത്രക്കാരെ അതിർത്തിയിൽ നിരീക്ഷിക്കാനും, ഏഴു ദിവസത്തെ ഹോം ക്വറന്‍റീൻ നിർബന്ധമാക്കാനും തമിഴ് നാട് തീരുമാനിച്ചിട്ടുണ്ട്. വിമാനത്തിൽ എത്തുന്നവർക്കു തമിഴ്നാട്ടിൽ ഇറങ്ങണെങ്കിൽ കോവിഡ് നെഗറ്റീവ് സർട്ടിഫിക്കറ്റ് നിർബന്ധമാക്കിയിട്ടുണ്ട്.

കേരളത്തിൽനിന്നുള്ള യാത്രക്കാർക്ക് പശ്ചിമ ബംഗാളിൽ ആർടിപിസിആർ പരിശോധന ഫലം നിർബന്ധമാക്കി. ഈ മാസം 27 മുതലാണ് നിയന്ത്രണം ഏർപ്പെടുത്തിയിരിക്കുന്നത്. യാത്ര പുറപ്പെടുന്നതിന് 72 മണിക്കൂർ മുമ്പ് എടുത്ത ആർടിപിസിആർ പരിശോധന ഫലമാണ് നിർബന്ധമാക്കിയത്. കേരളത്തിനു പുറമെ മഹാരാഷ്ട്ര, തെലങ്കാന, കർണാടകം എന്നിവിടങ്ങളിൽനിന്ന് എത്തുന്നവർക്കും ബംഗാൾ കോവിഡ് നെഗറ്റീവ് സർട്ടിഫിക്കറ്റ് നിർബന്ധമാക്കിയിട്ടുണ്ട്. വിമാനത്തിൽ എത്തുന്ന യാത്രക്കാർക്കാണ് നിയന്ത്രണം കർക്കശമാക്കിയിട്ടുള്ളത്.

തമിഴ്നാട്, കർണാടകം, പശ്ചിമ ബംഗാൾ എന്നിവയ്ക്കു പുറമെ മഹാരാഷ്ട്ര, ഉത്തരാഖണ്ഡ്, മണിപ്പൂർ, ഡൽഹി, ഗുജറാത്ത് എന്നീ സംസ്ഥാനങ്ങളും കേരളത്തിൽ നിന്നുള്ള യാത്രക്കാർക്ക് നിയന്ത്രണം കർക്കശമാക്കിയിട്ടുണ്ട്. കോവിഡ് പരിശോധന ഫലം നെഗറ്റീവായവരെ മാത്രമെ മംഗളുരുവിലേക്ക് കടത്തിവിടുവെന്ന് ദക്ഷിണ കന്നഡ ജില്ല അധികൃതർ നേരത്തെ അറിയിച്ചിരുന്നു.

കേരളം, ഗോവ, ഗുജറാത്ത്, രാജസ്ഥാൻ, ഡൽഹി എന്നിവിടങ്ങളിൽനിന്നുള്ള യാത്രക്കാർക്ക് മഹാരാഷ്ട്രയിൽ പോകണമെങ്കിലും ആർ ടി പി സി ആർ പരിശോധന ഫലം നെഗറ്റീവാണെന്ന സർട്ടിഫിക്കറ്റ് വേണം. മഹാരാഷ്ട്ര, കേരളം എന്നിവിടങ്ങളിൽനിന്നുള്ളവർക്കും കോവിഡ് നെഗറ്റീവ് സർട്ടിഫിക്കറ്റ് ഉണ്ടെങ്കിൽ മാത്രമെ, കർണാടകത്തിലും മണിപ്പൂരിലും പ്രവേശിക്കാൻ സാധിക്കുകയുള്ളു. ഒഡീഷയിൽ പുറത്തുനിന്ന് എത്തുന്ന 55 വയസിന് മുകളിലുള്ള എല്ലാവരും എത്തിയാൽ ഉടൻ കോവിഡ് പരിശോധന നടത്തണമെന്നാണ് നിർദേശം.

അതേസമയം കേരളത്തിൽനിന്നുള്ളവർക്ക്‌ കോവിഡിന്റെ പേരിൽ കർണാടക സർക്കാർ ഏർപ്പെടുത്തിയ യാത്രാവിലക്കിൽ അനിശ്ചിതത്വം തുടരുകയാണ്. കാസർകോട്‌ ജില്ലയിൽനിന്ന്‌ ദക്ഷിണ കന്നഡ, കുടക്‌ എന്നിവിടങ്ങളിലേക്കുള്ള യാത്രക്കാരെ ബുധനാഴ്‌ച പരിശോധനയില്ലാതെ കടത്തിവിട്ടു. ദക്ഷിണ കന്നഡയിലേക്ക്‌ പോകുന്നവർക്ക്‌ ഒരാഴ്‌ചത്തേക്ക്‌ കോവിഡ്‌ നെഗറ്റീവ്‌ റിപ്പോർട്ട്‌ നിർബന്ധമാക്കില്ലെന്ന്‌ ജില്ലാ അധികൃതർ അറിയിച്ചു. ശക്തമായ പ്രതിഷേധം ഉയർന്ന സാഹചര്യത്തിലാണിത്‌. എന്നാൽ, ഇതുസംബന്ധിച്ച്‌ ഉത്തരവിറങ്ങിയില്ല. കാസർകോട്‌ ജില്ലയിൽനിന്ന്‌ കർണാടകത്തിലേക്കുള്ള 17 റോഡുകളിൽ അഞ്ചെണ്ണമാണ്‌ തുറന്നത്‌. ഇതിലൂടെ വാഹനങ്ങൾ കടത്തിവിട്ടു. രോഗികളുമായി ആംബുലൻസിൽ എത്തുന്നവർ ആശുപത്രിയിൽ എത്തിയ ശേഷം കോവിഡ് പരിശോധന നടത്തണമെന്നും നിർദേശമുണ്ട്.

കേരളത്തില്‍ ഇന്ന് 3677 പേര്‍ക്ക് കോവിഡ്-19 സ്ഥിരീകരിച്ചതായി മുഖ്യമന്ത്രി പിണറായി വിജയന്‍. കോഴിക്കോട് 480, എറണാകുളം 408, കോട്ടയം 379, കണ്ണൂര്‍ 312, കൊല്ലം 311, പത്തനംതിട്ട 289, ആലപ്പുഴ 275, മലപ്പുറം 270, തിരുവനന്തപുരം 261, തൃശൂര്‍ 260, കാസര്‍ഗോഡ് 141, പാലക്കാട് 112, വയനാട് 93, ഇടുക്കി 86 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്. യു.കെ.യില്‍ നിന്നും വന്ന ആര്‍ക്കും തന്നെ കഴിഞ്ഞ 24 മണിക്കൂറിനകം കോവിഡ്-19 സ്ഥിരീകരിച്ചിട്ടില്ല. ഇതോടെ അടുത്തിടെ യു.കെ.യില്‍ നിന്നും വന്ന 91 പേര്‍ക്കാണ് ഇതുവരെ കോവിഡ്-19 സ്ഥിരീകരിച്ചത്. ഇവരില്‍ 81 പേരുടെ പരിശോധനാഫലം നെഗറ്റീവായി. ആകെ 11 പേരിലാണ് ജനിതക വകഭേദം വന്ന വൈറസിനെ കണ്ടെത്തിയത്. കഴിഞ്ഞ 24 മണിക്കൂറിനിടെ 63,582 സാമ്പിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 5.78 ആണ്. റുട്ടീന്‍ സാമ്പിള്‍, സെന്റിനല്‍ സാമ്പിള്‍, സിബി നാറ്റ്, ട്രൂനാറ്റ്, പി.ഒ.സി.ടി. പി.സി.ആര്‍., ആര്‍.ടി. എല്‍.എ.എം.പി., ആന്റിജന്‍ പരിശോധന എന്നിവ ഉള്‍പ്പെടെ ഇതുവരെ ആകെ 1,12,71,993 സാമ്പിളുകളാണ് പരിശോധനയ്ക്കായി അയച്ചത്. കഴിഞ്ഞ ദിവസങ്ങളിലുണ്ടായ 14 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 4150 ആയി.