മലപ്പുറത്ത് 14കാരിയെ ലഹരിമരുന്ന് നൽകി പീഡിപ്പിച്ചു; രണ്ടുപേർ അറസ്റ്റിൽ; അഞ്ചുപേർക്കായി തിരച്ചിൽ

മലപ്പുറം കൽപകഞ്ചേരിയിൽ 14 കാരിയെ ലഹരി മരുന്ന് നൽകി പീഡിപ്പിച്ച രണ്ട് പേരെ പൊലീസ് അറസ്റ്റ് ചെയ്തു. പെൺകുട്ടിയെ പീഡിപ്പിച്ച മറ്റ് 5 പേർക്ക് വേണ്ടി പോലീസ് അന്വേഷണം ശക്തമാക്കി. മാസങ്ങളോളം പെൺകുട്ടിയെ ഇവർ ലൈംഗികമായി ഉപദ്രവിച്ചു എന്നാണ് പോലീസ് പറയുന്നത്.

 ഇൻസ്റ്റാഗ്രാം വഴി ആണ് പെൺകുട്ടി ഇവരുമായി പരിചയപ്പെടുന്നത്. സൗഹൃദം സ്ഥാപിച്ച ശേഷം യുവാക്കൾ ലഹരി മരുന്ന് നൽകി കുട്ടിയെ പീഡിപ്പിക്കുക ആയിരുന്നു. കൽപകഞ്ചേരി മേഖലയിൽ തന്നെ ഉള്ളവരാണ് പ്രതികൾ. പിടിയിലായ രണ്ട് പേർക്ക് 19 ഉം 24 ഉം വയസ്സുണ്ട്. കഴിഞ്ഞ ആഴ്ച ആണ് ചൈൽഡ് ലൈൻ ഇക്കാര്യം അറിയുന്നത്. കുട്ടിയെ കൗൺസിലിംഗ് നൽകിയപ്പോൾ ആണ് പീഡന വിവരം പുറത്ത് വന്നത്.

ചൈൽഡ് ലൈൻ പോലീസിന് വിവരം നൽകി. ഇതിന് പിന്നാലെ ആണ് രണ്ട് പ്രതികൾ പിടിയിൽ ആയത്. മറ്റുള്ളവർ അന്യ സംസ്ഥാനങ്ങളിലേക്ക് കടന്നു എന്നാണ് പൊലീസ് സംശയിക്കുന്നത്. പെൺകുട്ടിക്ക് കഞ്ചാവും മറ്റ് ലഹരി വസ്തുക്കളും നൽകി ആണ് പീഡിപ്പിച്ചത് എന്നാണ് പോലീസ് പറയുന്നത്. കഴിഞ്ഞ വർഷം മാർച്ച് മാസത്തിനു ശേഷം ആണ് പെൺകുട്ടി യുവാക്കളെ പരിചയപ്പെടുന്നതും ഇവർ ലഹരി മരുന്നുകൾ കുട്ടിക്ക് നൽകി പീഡിപ്പിക്കുന്നതും. പെൺകുട്ടിയെ വിശദമായ കൗൺസിലിംഗിനും തുടർ ചികിത്സകൾക്കും വേണ്ടി നിർഭയ ഹോമിലേക്ക് മാറ്റി.

ഇതിനിടെ, മുക്കത്ത് 13 വയസ്സുകാരിയെ പീഡിപ്പിച്ച കേസില്‍ മാതാവും രണ്ടാനച്ഛനും അടക്കം എട്ട് പ്രതികളും കുറ്റക്കാരാണെന്ന് കോടതി വിധിച്ചു. മാതാവിന് ഏഴ് വര്‍ഷം തടവും രണ്ടാനച്ഛനടക്കം ഏഴ് പ്രതികള്‍ക്ക് 10 വര്‍ഷം തടവും ശിക്ഷ വിധിച്ചു. കോഴിക്കോട് അതിവേഗ കോടതി ജഡ്ജി ശ്യാംലാലാണ് കേസില്‍ വിധി പ്രസ്താവിച്ചത്. മുക്കം പൊലിസ് രജിസ്റ്റര്‍ ചെയ്ത കേസില്‍ എട്ടാം പ്രതിയേയും പത്താം പ്രതിയേയും കോടതി വെറുതെ വിട്ടു. ഇനി അഞ്ചുപ്രതികളെ കൂടി കണ്ടെത്താനുണ്ട്. ഒടുവില്‍ 14 വര്‍ഷത്തിന് ശേഷമാണ് കോഴിക്കോട് അതിവേഗ കോടതി കേസില്‍ വിധി പറഞ്ഞത്.

മുക്കം സ്വദേശിയായ 13 കാരി മാതാപിതാക്കള്‍ വിവാഹമോചനം നടത്തിയതിനാല്‍ മാതാവിനും രണ്ടാനച്ഛനുമൊപ്പം കഴിയുകയായിരുന്നു. കുട്ടിയെ പ്രലോഭിപ്പിച്ച് രണ്ടാനച്ഛന്‍ അമ്മയുടെ സഹായത്തോടെ ലൈംഗികമായി പീഡിപ്പിച്ച് നിരവധി പേര്‍ക്ക് കാഴ്ചവെച്ചു എന്നതാണ് കേസ്. പ്രായപൂര്‍ത്തിയാവാത്ത കുട്ടിയെ പീഡിപ്പിച്ചതിനും വ്യഭിചാരത്തിന് വിറ്റതിനും ബലാത്സംഗത്തിനും ഇന്ത്യന്‍ ശിക്ഷാനിയമം 366 എ, 372, 373, 376 തുടങ്ങി വിവിധ വകുപ്പുകള്‍ അനുസരിച്ചാണ് പത്തുപ്രതികള്‍ക്കെതിരെ കുറ്റം ചുമത്തിയിരുന്നത്. 2007 -08 കാലത്ത് കോഴിക്കോട്, ഊട്ടി, ഗുണ്ടല്‍പേട്ട, വയനാട്, മണാശേരി തുടങ്ങി നിരവധിയിടങ്ങളില്‍ വീട്ടിലും ഹോട്ടലുകളിലുമായി പലര്‍ക്കായി പണത്തിനു വേണ്ടി കാഴ്ചവെച്ച് പീഡനത്തിനിരയാക്കിയെന്നാണ് കേസ്. പീഡനം സഹിക്കാനാവാതെ പിതാവിന് അടുത്തെത്തിയ കുട്ടിയെ അദ്ദേഹം കോഴിക്കോട് അന്വേഷി ഷോര്‍ട്ട് സ്റ്റേ ഹോമിലെത്തിക്കുകയായിരുന്നു.