തടവിൽ പാർപ്പിച്ച് കൂട്ട ബലാത്സംഗം; ഒടുവിൽ 17കാരിയെ ജീവനോടെ കത്തിച്ച് കാമുകനും അമ്മയും

അഗർത്തല: ദിവസങ്ങളോളം തടവിൽ പാർപ്പിച്ച് ക്രൂര ബലാത്സംഗത്തിനിരയാക്കിയ ശേഷം പെൺകുട്ടിയെ ജീവനോടെ കത്തിച്ചു കൊന്നു. ത്രിപുരയിലെ അഗർത്തലയിലാണ് മനുഷ്യമനസാക്ഷിയെ ഞെട്ടിക്കുന്ന അതിക്രമം അരങ്ങേറിയത്.

ശാന്തിർബസാറിലാണ് സംഭവം. സോഷ്യൽ മീഡിയ വഴി പരിചയപ്പെട്ട ഒരു യുവാവുമായി പെൺകുട്ടി പ്രണയത്തിലായിരുന്നു. ദീപാവലിക്ക് പിന്നാലെ പെൺകുട്ടി ഇയാളുമായി ഒളിച്ചോടിയെന്നാണ് പൊലീസ് പറയുന്നത്.

എന്നാൽ പെൺകുട്ടിയെ തടവിലാക്കിയ അജയ് രുദ്രപാൽ എന്ന യുവാവ് മോചനദ്രവ്യമായി 50000 രൂപ വീട്ടുകാരോട് ആവശ്യപ്പെട്ടു. ഈ സമയത്താണ് സുഹൃത്തുക്കൾക്കൊപ്പം ചേർന്ന് പെൺകുട്ടിയെ കൂട്ട ബലാത്സംഗത്തിനിരയാക്കിയത്.

ഇയാൾ ആവശ്യപ്പെട്ട മുഴുവൻ തുകയും സംഘടിപ്പിക്കാനാകാതെ വന്നപ്പോൾ ആകെയുള്ള 17000 രൂപയുമായി ഇവർ അജയിയെ സമീപിച്ചു. എന്നാൽ ഇയാളും മാതവും ചേർന്ന് മടക്കി അയച്ചുവെന്നാണ് പെൺകുട്ടിയുടെ വീട്ടുകാർ പറയുന്നത്.

പൊലീസിന് പരാതി നൽകിയെങ്കിലും ഫലം ഉണ്ടായില്ലെന്നും ഇവർ ആരോപിക്കുന്നു. ഒടുവിൽ പെൺകുട്ടിയെ കുറിച്ച് വിവരം ലഭിച്ച വീട്ടുകാര്‍ രക്ഷിക്കാനുള്ള പദ്ധതി തയ്യാറാക്കുന്നതിനിടെയാണ് കുട്ടിയെ കത്തിച്ചുവെന്ന വിവരം എത്തുന്നത്.

പ്രതിയുടെ അയൽവാസികളാണ് 90% പൊള്ളലേറ്റ കുട്ടിയെ ആശുപത്രിയിലെത്തിച്ചത്. എന്നാൽ അപ്പോഴേക്കും മരിച്ചിരുന്നു. പ്രതിയും അയാളുടെ മാതാവും ചേർന്നാണ് പെൺകുട്ടിയെ അഗ്നിക്കിരയാക്കിയതെന്നാണ് സമീപവാസികൾ പറയുന്നത്. ഇരുവരെയും പരിസരവാസികൾ തന്നെ പിടികൂടി പൊലീസിലേൽപ്പിച്ചു.