പത്തൊമ്പതുകാരിയെ സഹോദരൻ വെടിവെച്ച് കൊന്നു; ഭർത്താവ് ഗുരുതരാവസ്ഥയിൽ

ബറേയ് ലി: ബറേയ്ലിയിൽ പത്തൊമ്പതുകാരിയെ സഹോദരൻ വെടിവെച്ച് കൊന്നു. ഇവരുടെ ഭർത്താവിന് ഗുരുതരമായി പരുക്കേറ്റു. ബറേയ്ലിലെ കരുവ സഹേബ്ഗഞ്ച് ഗ്രാമത്തിലാണ് സംഭവം. ദുരഭിമാനക്കൊല എന്നാണ് സംശയിക്കുന്നത്.

പെൺകുട്ടിയുടെ സഹോദരനായ ഗുൽഷർ പെൺകുട്ടിയെയും ഭർത്താവിനെയും വെടിവയ്ക്കുകയായിരുന്നു. വ്യാഴാഴ്ച രാവിലെയാണ് സംഭവം. മോഹിനി എന്നാണ് മരിച്ച പെൺകുട്ടിയുടെ പേര്.

ഇവർ സംഭവ സ്ഥലത്തു തന്നെ മരിച്ചു. ഇവരുടെ ഭര്‍ത്താവ് രാം കിഷോർ ബറേത്തയെ ഗുരുതര പരുക്കുകളോടെ ആശുപത്രിയിൽ പ്രവേശിപ്പിച്ചു.

വീട്ടുകാരുടെ എതിർപ്പുകളെ മറികടന്ന് 2018ലാണ് ഇവർ വിവാഹിതരായത്. ഇതിനു പിന്നാലെ ഇവർ ഗ്രാമത്തിൽ നിന്ന് പോയിരുന്നു. എന്നാൽ അടുത്തിടെ ഗ്രാമത്തിലേക്ക് തിരിച്ചെത്തി.

ഗുൽഷറിനെതിരെ എഫ്ഐആർ രജിസ്റ്റർ ചെയ്തിട്ടുണ്ട്. ഇയാളെ അറസ്റ്റ് ചെയ്യാനുള്ള ശ്രമങ്ങൾ തുടരുകയാണ്. മോഹിനിയുടെ മൃതദേഹം പോസ്റ്റ്മോർട്ടത്തിനായി അയച്ചു.