സഞ്ജീവനി ഓൺലൈൻ പോർട്ടലിലൂടെ വനിതാ ഡോക്ടർക്ക് നേരെ നഗ്നതാ പ്രദർശനം; 21കാരൻ പിടിയിൽ

പത്തനംതിട്ട: ഇ-സഞ്ജീവനി ഓൺലൈൻ പോർട്ടലിലൂടെ കോന്നി മെഡിക്കൽ കോളജിലെ വനിതാ ഡോക്ടർക്ക് നേരെ നഗ്നതാ പ്രദർശനം നടത്തിയ പ്രതി പിടിയിൽ.

തൃശുർ കരിവണ്ണൂർ സ്വദേശി ഷൂഹൈബ് എന്ന 21 കാരനാണ് ആറന്മുള പൊലീസിന്റെ പിടിയിലായത്. കഴിഞ്ഞ ദിവസമാണ് സംഭവം നടന്നത്.

ആരോഗ്യ വകുപ്പിന്റെ ഇ-സഞ്ജീവനി ടെലീ മെഡിസിൻ സൈറ്റിൽ സേവനം നടത്തുകയായിരുന്ന ആറന്മുള സ്വദേശിയായ വനിതാ ഡോക്ടർക്ക് നേരെയാണ് രോഗി എന്ന വ്യാജേന ലോഗിൻ ചെയ്ത യുവാവ്, മുഖം മറച്ച് സ്വകാര്യ ഭാഗങ്ങൾ കാട്ടിയത്

സ്ക്രീൻ ഷോട്ട് വനിത ഡോക്ടർ പൊലീസിന് കൈമാറി. ദൃശ്യങ്ങൾ സി- ഡാക്കിൽ നിന്നും തെളിവായി പൊലീസ് ശേഖരിക്കും വനിതാ ഡോക്ടറെ കൂടാതെ മറ്റ് രണ്ട് ഡോക്ടർമാരുടെ അപ്പോയ്ന്റ്മെന്റ് കൂടി ഷുഹൈബ് നേടിയിരുന്നു. അവർ ഇരുവരും പുരുഷ ഡോക്ടർമാർ ആയിരുന്നു. തുടർന്നാണ് ഇയാൾ വനിതാ ഡോക്ടർക്ക് നേരെ നഗ്നതാ പ്രദർശനം നടത്തിയത്.

കോന്നി മെഡിക്കൽ കോളജിലെ ഡോക്ടറായ പരാതിക്കാരി മെഡിക്കൽ കോളജ് പ്രിൻസിപ്പാളിന് ഇ- മെയിലിൽ പരാതി നൽകുകയും പ്രൻസിപ്പൽ പരാതി കോന്നി പൊലീസിന് കൈമാറുകയും ചെയ്തുവെങ്കിലും സംഭവ സമയം ഡോക്ടർ കോഴഞ്ചേരിയിലായിരുന്നതിനാൽ കോന്നി പൊലീസ് കേസ് ആറന്മുള പൊലീസിന് കൈമാറുകയുമായിരുന്നു.

കേസിൽ അന്വേഷണം ആരംഭിച്ച ആറമുള പൊലീസ് പോർട്ടലിൽ രജിസ്റ്റർ ചെയ്യാനുപയോഗിച്ച ഫോൺ നമ്പർ കണ്ടെത്തിയാണ് ഷുഹൈബിന് അറസ്റ്റ ചെയ്തത്.