ഹെൽമറ്റില്ലാതെ ഇന്ന് കുടുങ്ങിയത് 455 പേർ; പിഴയൊടുക്കിയവരിൽ 91 പിൻസീറ്റ് യാത്രക്കാരും

തിരുവനന്തപുരം: ഹെൽമെറ്റ് ഇല്ലാതെ ഇരുചക്ര വാഹനങ്ങളുടെ പിൻസീറ്റിൽ യാത്ര ചെയ്യുന്നവരിൽ നിന്നും മോട്ടോർ വാഹന വകുപ്പ് പിഴ ഈടാക്കിത്തുടങ്ങി. ഇന്ന് 91 പേർക്കാണ് പിഴ ചുമത്തിയത്.

നിലവിലെ നിയമമനുസരിച്ച് 500 രൂപയാണ് പിഴ. ഹെൽമെറ്റ് ഇല്ലാതെ യാത്ര ചെയ്തതിന് 455 പേർക്ക് പിഴ ചുമത്തി. പിൻസീറ്റിൽ ഹെൽമെറ്റ് ധരിക്കാത്ത 91 പേർക്കും സീറ്റ് ബൽറ്റില്ലാതെ യാത്ര ചെയ്ത 77 പേർക്കും പിഴ ചുമത്തി. 2,50,500 പിഴയിനത്തിൽ മോട്ടോർ വാഹനവകുപ്പിന് ലഭിച്ചത്.

ഇരുചക്രവാഹനത്തിലെ രണ്ട് പേരും ഹെൽമെറ്റ് ധരിച്ചില്ലെങ്കിൽ ഡ്രൈവറിൽ നിന്നാണ് പിഴ ഈടാക്കുന്നത്.

നിയമം ലംഘനം തുടർന്നാൽ ലൈസൻസ് റദ്ദാക്കുന്നതുൾപ്പടെയുള്ള നടപടികളിലേക്ക് കടക്കും. 85 എൻഫോഴ്സ്മെന്റ് സ്വാഡുകളാണ് സംസ്ഥാന വ്യപകമായി പരിശോധന നടത്തുന്നത്.

ഇരുചക്രവാഹനത്തില്‍ രണ്ട് യാത്രക്കാരും ഹെൽമെറ്റ് ഇല്ലാതെ യാത്ര ചെയ്താൽ അത് രണ്ട് നിയമലംഘനമായാണ് കണക്കാക്കുന്നത്.