സ്കൂട്ടർ യാത്രക്കാരിയെ ഇടിച്ചുവീഴ്ത്തി; 48കാരി അറസ്റ്റിൽ; സ്റ്റേഷനിൽവെച്ച് പ്രതി വസ്ത്രങ്ങൾ വലിച്ചുകീറി

കൊച്ചി: വാഹനത്തിന് സൈഡ് നല്‍കിയില്ലെന്ന് ആരോപിച്ച്‌ സ്‌കൂട്ടര്‍ യാത്രക്കാരിയെ ഇടിച്ചുവീഴ്ത്തുകയും മർദ്ദിക്കുകയും ചെയ്തതായി പരാതി. സംഭവത്തിൽ 48കാരിയെ പൊലീസ് അറസ്റ്റ് ചെയ്തു. കോടുശേരി പൊന്നാടത്ത് വീട്ടില്‍ സിഫ്‌സിയാണ് അറസ്റ്റിലായത്.

കഴിഞ്ഞ ദിവസം രാവിലെ 11 മണിയോടെ അങ്കമാലി ടിബി ജംക്ഷനിലായിരുന്നു സംഭവം. വാഹനത്തിന് സൈഡ് നൽകിയില്ലെ ആരോപിച്ചു സ്കൂട്ടർയാത്രക്കാരിയെ പിന്നിൽനിന്ന് ഇടിച്ചുവീഴത്തുകയായിരുന്നു. അതിനുശേഷം മർദ്ദിക്കുകയും ചെയ്തു. ആക്രമണത്തില്‍ പരുക്കേറ്റ യാത്രക്കാരിയെ ആശുപത്രിയില്‍ പ്രവേശിപ്പിച്ചു.

സ്‌കൂട്ടര്‍ യാത്രക്കാരിയെ നടുറോഡില്‍ ഇടിച്ചുവീഴ്ത്തിയും കഴുത്തില്‍ പിടിച്ച്‌ ശ്വാസം മുട്ടിച്ചുമായിരുന്നു ഇരുപതുകാരിയെ സിഫ്‌സി ഉപദ്രവിച്ചത്. കൂടാതെ സ്കൂട്ടർയാത്രക്കാരിയെ അസഭ്യം പറയുകയും ചെയ്തതായി പൊലീസിന് ലഭിച്ച പരാതിയിൽ പറയുന്നു.

ഓടിക്കൂടിയ നാട്ടുകാരുടെ സഹായത്തോടെയാണ് സിഫ്സിയെ പിടികൂടിയത്. ഇവരെ പിന്നീട് പൊലീസ് സ്റ്റേഷനിലെത്തിച്ചപ്പോൾ സ്വന്തം വസ്ത്രങ്ങള്‍ വലിച്ചുകീറി ബഹളംവച്ചു. മനോനില തെറ്റിയവരെ പോലെയായിരുന്നു ഇവരുടെ പെരുമാറ്റം. ഒടുവിൽ കൂടുതൽ വനിത പൊലീസ് എത്തിയാണ് ഇവരെ ശാന്തമാക്കിയത്. സിഫ്സിക്കെതിരെ വിവിധ വകുപ്പുകൾ പ്രകാരം പൊലീസ് കേസെടുത്തിട്ടുണ്ട്.