കരിപ്പൂരില്‍ അടുത്താകാലത്തുണ്ടായ ഏറ്റവും വലിയ സ്വര്‍ണ്ണവേട്ട; 9 കിലോ സ്വർണവുമായി പിടിയിലായത് എയര്‍ ഇന്ത്യ എക്‌സ്പ്രസ് ജീവനക്കാരൻ ഉൾപ്പെടെ 6 പേര്‍

കോഴിക്കോട്: അടുത്തകാലത്ത് കരിപ്പൂരിലുണ്ടായ ഏറ്റവും വലിയ സ്വര്‍ണ്ണവേട്ടയാണ് ഇന്നലെ രാത്രിയുണ്ടായത്. ഒമ്പത് കിലോ സ്വര്‍ണ്ണവുമായി എയര്‍ ഇന്ത്യ എക്‌സ്പ്രസ് ജീവനക്കാരന്‍ ഉള്‍പ്പെടെ ആറ് പേര്‍ ഡിആര്‍ഐയുടെ പിടിയിലായി. എയര്‍ ഇന്ത്യന്‍ എക്‌സ്പ്രസ് കാബിന്‍ ജീവനക്കാരനായ അന്‍സാര്‍ സുബൈറാണ് പിടിയിലായത്.

രണ്ട് കിലോ സ്വര്‍ണത്തിന്റെ സംയുക്തം കവറിലാക്കി നിസാര്‍ സുബൈറിന്റെ അരയില്‍ കെട്ടിവച്ച നിലയിലായിരുന്നു. വിമാനത്തില്‍ ഒളിപ്പിച്ചുവച്ച നിലയില്‍ ഏഴ് കിലോ സ്വര്‍ണസംയുക്തം വേറെയും ലഭിച്ചു.

സ്വര്‍ണ്ണം ഏറ്റുവാങ്ങാനെത്തിയ അഞ്ചുപേരാണ് പിടിയിലായ മറ്റുള്ളവര്‍. കൊണ്ടോട്ടി സ്വകാര്യ ആശുപത്രിയില്‍ വൈദ്യപരിശോധനയ്ക്കിടെ ഡിആര്‍ഐ കസ്റ്റഡിയില്‍ നിന്ന് രക്ഷപ്പെട്ട നിലമ്പൂര്‍ സ്വദേശി മൂസാന്‍ പിന്നീട് പിടിയിലായി.

ദുബൈയില്‍ നിന്നെത്തിയ എയര്‍ ഇന്ത്യ എക്‌സ്പ്രസ് ഐ എക്‌സ് 344 വിമാനത്തിലാണ് സ്വര്‍ണ്ണക്കടത്ത് നടന്നത്. നാലുകോടിയോളം രൂപ വിലമതിക്കുന്ന സ്വര്‍ണ്ണം കടത്തിയ നിസാര്‍ സുബൈര്‍ കഴിഞ്ഞവര്‍ഷമാണ് എയര്‍ ഇന്ത്യ എക്‌സ്പ്രസിന്റെ കാബിന്‍ ക്രൂവായി ജോലിയില്‍ പ്രവേശിച്ചത്.

സ്വര്‍ണ്ണക്കളക്കടത്തുമായുള്ള വിവാദങ്ങള്‍ കേരളത്തില്‍ കൊടുമ്പിരികൊണ്ടിരിക്കെയും കരിപ്പൂരിലൂടെ സ്വര്‍ണ്ണക്കടത്ത് പതിവ്‌പോലെ നടക്കുന്നുണ്ട്.

കോവിഡ് ഭീതിയൊഴിഞ്ഞ് വിമാനം സര്‍വീസ് ആരംഭിച്ചശേഷം പത്തിലധികം സ്വര്‍ണ്ണവേട്ട കരിപ്പൂരില്‍ മാത്രം നടന്നതായി അധികൃതര്‍ പറയുന്നു. സ്വര്‍ണ്ണക്കടത്ത് സംഘവും കവര്‍ച്ചാസംഘവും ഏറ്റുമുട്ടുന്നതും കരിപ്പൂരിൽ പതിവാണ്.