അമ്മയ്ക്കരികിൽ ഉറങ്ങുകയായിരുന്ന എട്ടു വയസുകാരിയെ തട്ടിക്കൊണ്ടു പോയി പീഡിപ്പിച്ചു

ഗുജറാത്തിലെ രാജ് കോട്ടിൽ കത്തി മുനയിൽ നിർത്തിയാണ് എട്ടു വയസുകാരിയെ അജ്ഞാതൻ പീഡനത്തിനിരയാക്കിയത്. ദിവസക്കൂലി തൊഴിലാളിയായ അമ്മയ്ക്കൊപ്പം ഒരു പൊതു സ്ഥലത്തുറങ്ങിക്കിടക്കുകയായിരുന്ന കുട്ടിയെ ഇവിടെ നിന്ന് തട്ടിക്കൊണ്ടു പോയ ശേഷമായിരുന്നു അതിക്രമം

രാജ്കോട്ടിലെ തോറാല മേഖലയിലെ ഒരു പൂന്തോട്ടത്തിലായിരുന്നു അമ്മയ്ക്കൊപ്പം കുട്ടി ഉറങ്ങിയിരുന്നത്, ഇക്കഴിഞ്ഞ ശനിയാഴ്ചയായിരുന്നു ഇവിടെ നിന്ന് കുട്ടിയെ ഒരാൾ തട്ടിയെടുത്ത് ഒഴിഞ്ഞ പ്രദേശത്തെത്തിച്ച് പീഡനം നടത്തിയത്. കത്തി കാട്ടി ഭീഷണിപ്പെടുത്തിയായിരുന്നു ഉപദ്രവമെന്നാണ് കുട്ടി നൽകിയ മൊഴി അനുസരിച്ച് പൊലീസ് പറയുന്നത്

കുട്ടിയുടെ അമ്മ നൽകിയ പരാതിയുടെ അടിസ്ഥാനത്തിൽ കേസെടുത്ത പൊലീസ് പ്രതിക്കായി അന്വേഷണം ആരംഭിച്ചിട്ടുണ്ട്. ഇയാളെക്കുറിച്ച് എന്തെങ്കിലും വിവരം നൽകുന്നവർക്ക് 50000 രൂപ പാരിതോഷികവും പ്രഖ്യാപിച്ചിട്ടുണ്ട്

ബലാത്സംഗം, തട്ടിക്കൊണ്ടു പോകൽ, ക്രിമിനൽ ഗൂഢാലോചന എന്നിവയ്ക്കു പുറമെ പോക്സോ വകുപ്പ് പ്രകാരവും വിവിധ കുറ്റങ്ങൾ പ്രതിക്കെതിരെ ചുമത്തിയിട്ടുണ്ട്.