തായ് ലൻഡിൽ നിന്നുള്ള വിനോദസഞ്ചാരി ഹരിയാനയിൽ കൂട്ടബലാത്സംഗത്തിന് ഇരയായി

ന്യൂഡൽഹി: വിനോദസഞ്ചാരിയായ യുവതി ഹരിയാനയിലെ ഹിസാറിൽ കൂട്ടബലാത്സംഗത്തിന് ഇരയായി. തായ് ലൻഡിൽ നിന്നുള്ള 41കാരിയെയാണ് ഹിസാറിലെ ഹോട്ടൽ മാനേജരും കൂട്ടാളികളും കൂട്ടബലാത്സംഗത്തിന് ഇടയാക്കിയത്.

ഓഗസ്റ്റ് എട്ടിനാണ് സംഭവം. സംഭവത്തിലെ പ്രധാനപ്രതിയായ ഹോട്ടൽ മാനേജരെ അറസ്റ്റ് ചെയ്തതായി പൊലീസ് പറഞ്ഞു. സംഭവവുമായി ബന്ധപ്പെട്ട് ബാക്കിയുള്ള പ്രതികളെ ഇതുവരെ അറസ്റ്റ് ചെയ്തിട്ടില്ല.

"സംഭവത്തിലെ പ്രധാനപ്രതിയായ ഗുൽഷനെ ഞങ്ങൾ അറസ്റ്റ് ചെയ്തു. എന്നാൽ, പ്രതികളായ മറ്റുള്ളവർ ഒളിവിലാണ്. ഐ പി സി 376, 342 എന്നീ വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ട്. മെഡിക്കൽ റിപ്പോർട്ട് ലഭിക്കുന്നതിനായി കാത്തിരിക്കുകയാണ്" - ഹിസാർ എസ് എച്ച് ഒ മൻമോഹൻ സിംഗ് പറഞ്ഞു.

ഓഗസ്റ്റ് ആറിനാണ് യുവതി ഹിസാറിൽ എത്തിയത്. ഹിസാറിലെ റെഡ് സ്ക്വയർ മാർക്കറ്റിലെ ഹോട്ടൽ റീജൻസിയിൽ താമസിച്ചു വരികയായിരുന്നു യുവതി. ഹോട്ടൽ മാനേജരും കൂട്ടാളികളും ഇരയുടെ മുറിയിൽ കടന്നുകയറി അവരെ ബലാത്സംഗം ചെയ്യുകയായിരുന്നു.

ഓഗസ്റ്റ് എട്ടിന് പുലർച്ചെ നാലുമണിക്ക് പ്രതികൾ തന്റെ മുറിയിൽ പ്രവേശിക്കുമ്പോൾ താൻ ഉറങ്ങുകയായിരുന്നുവെന്ന് യുവതി പൊലീസിനോട് പറഞ്ഞു.

ഹോട്ടൽ മാനേജർ ഗുൽഷനും കൂട്ടാളികളും ചേർന്ന് യുവതിയെ ബലാത്സംഗം ചെയ്യുകയായിരുന്നു. യുവതി ബഹളമുണ്ടാക്കിയതിനെ തുടർന്ന് ആളുകൾ ഹോട്ടലിനു സമീപത്ത് തടിച്ചുകൂടുകയും പൊലീസിൽ വിവരം അറിയിക്കുകയുമായിരുന്നു.

സുഹൃത്തിനൊപ്പം ടൂറിസ്റ്റ് വിസയിൽ മാർച്ചിലാണ് യുവതി ഇന്ത്യയിൽ എത്തിയത്. എന്നാൽ, കൊറോണവൈറസ് മഹാമാരിയെ തുടർന്ന് അന്താരാഷ്ട്ര വിമാനങ്ങൾ സർവീസ് നിർത്തിയതിനെ തുടർന്ന് അവർക്ക് തിരികെ പോകാൻ കഴിഞ്ഞില്ല.

തായ് ഭാഷ മാത്രമേ യുവതിക്ക് സംസാരിക്കാൻ കഴിയുകയുള്ളൂ. അതുകൊണ്ടു തന്നെ പൊലീസ് നടപടികൾ വൈകി.

എന്നിരുന്നാലും പ്രധാന പ്രതിയായ 25 വയസുകാരനായ ഗുൽഷനെ അറസ്റ്റ് ചെയ്തു കോടതിയിൽ ഹാജരാക്കാൻ പൊലീസിന് കഴിഞ്ഞു. ഇയാളെ 14 ദിവസത്തേക്ക് ജുഡീഷ്യൽ റിമാൻഡ് ചെയ്തു. പ്രതിയെയും ഇരയായ യുവതിയെയും വൈദ്യപരിശോധനയ്ക്ക് വിധേയമാക്കി.