മദ്യലഹരിയിൽ ഭാര്യയെ ആക്രമിച്ചതിന് മുൻ ക്രിക്കറ്റ് താരം വിനോദ് കാംബ്ലിക്കെതിരെ കേസെടുത്തു

മദ്യലഹരിയിൽ രണ്ട് കുട്ടികളുടെ മുന്നിൽ വെച്ച് ഭാര്യയെ മർദ്ദിച്ചെന്ന പരാതിയിൽ ക്രിക്കറ്റ് താരം വിനോദ് കാംബ്ലിക്കെതിരെ പോലീസ് കേസെടുത്തു. കാംബ്ലിയുടെ ഭാര്യ ആൻഡ്രിയ നൽകിയ പരാതിയിലാണ് മുംബൈയിലെ ബാന്ദ്ര പൊലീസ് കേസെടുത്തത്. സംഭവത്തിൽ അന്വേഷണം നടക്കുകയാണെന്ന് പൊലീസ് അറിയിച്ചു.

വെള്ളിയാഴ്ച രാത്രി ആൻഡ്രിയ സ്റ്റേഷനിലെത്തി പരാതി നൽകിയതോടെ എഫ്‌ഐആർ ഫയൽ ചെയ്തെന്ന് ബാന്ദ്ര പോലീസ് അറിയിച്ചു. ബാന്ദ്ര റിക്ലമേഷനിലെ ജെഡബ്ല്യുഎൽ കോഓപ്പറേറ്റീവ് ഹൗസിംഗ് സൊസൈറ്റിയിലെ തങ്ങളുടെ വസതിയിൽവെച്ച് കാംബ്ലി മദ്യപിക്കുകയും മോശമായി പെരുമാറുകയും അക്രമാസക്തനാകുകയും ചെയ്തുവെന്ന് ആൻഡ്രിയ മൊഴിയിൽ പറഞ്ഞതായി പോലീസ് വ്യക്തമാക്കി.

"പാചകത്തിനായി ഉപയോഗിക്കുന്ന പാനിന്‍റെ പൊട്ടിയ ഹാൻഡിൽ ഭർത്താവ് തന്റെ നേർക്ക് എറിഞ്ഞതായും ഇതുകൊണ്ട് തലയ്ക്ക് പരിക്കേറ്റെന്നും ആൻഡ്രിയ പൊലീസിന് മൊഴി നൽകി. ബാറ്റ് കൊണ്ട് അടിക്കാൻ ശ്രമിച്ചെങ്കിലും അത് പിടിച്ചുവാങ്ങിയതായും ആൻഡ്രിയ പറഞ്ഞു. ഈ സംഭവത്തെത്തുടർന്ന് കാംബ്ലിയുടെ ഭാര്യയും മക്കളും വീടുവിട്ടിറങ്ങി," ബാന്ദ്ര പോലീസ് സ്റ്റേഷനിലെ ഒരു ഉദ്യോഗസ്ഥൻ പറഞ്ഞു.

തുടർന്ന് ബാന്ദ്രയിലെ ഭാഭ ആശുപത്രിയിൽ ചികിത്സയിലായിരുന്ന ആൻഡ്രിയ പിന്നീട് പോലീസ് സ്റ്റേഷനിലെത്തി മൊഴി രേഖപ്പെടുത്തുകയും മെഡിക്കൽ റിപ്പോർട്ടിന്റെ പകർപ്പ് സമർപ്പിക്കുകയും ചെയ്തു.

അപകടകരമായ ആയുധം ഉപയോഗിച്ച് പരിക്കേൽപ്പിച്ചതിനും ഇന്ത്യൻ ശിക്ഷാനിയമപ്രകാരം സമാധാന ലംഘനത്തിന് പ്രേരിപ്പിക്കുന്ന ഉദ്ദേശത്തോടെ മനഃപൂർവം അപമാനിച്ചതിനുമാണ് കാംബ്ലിക്കെതിരെ കേസെടുത്തിരിക്കുന്നതെന്ന് ഉദ്യോഗസ്ഥൻ പറഞ്ഞു.

17 ടെസ്റ്റുകളിൽ നിന്ന് 54.20 ശരാശരിയിൽ 1,084 റൺസാണ് മുൻ ഇന്ത്യൻ ബാറ്റ്സ്മാൻ നേടിയത്. 104 ഏകദിനങ്ങളിൽ നിന്ന് 32.59 ശരാശരിയിൽ 2,477 റൺസാണ് കാംബ്ലി നേടിയത്. തന്റെ ഹ്രസ്വ ടെസ്റ്റ് കരിയറിൽ രണ്ട് ഇരട്ട സെഞ്ച്വറികളും അദ്ദേഹം നേടി.