കുടുങ്ങിയവരിൽ കണ്ണൂരിനു പുറത്തുള്ള വിദ്യാർത്ഥിനികളും; നമ്പർ റീചാർജിങ് കേന്ദ്രങ്ങളിൽ നിന്ന്

കണ്ണൂർ : ഷെയര്‍ചാറ്റ് വഴി പരിചയപ്പെട്ട പെണ്‍കുട്ടിയെ പീഡിപ്പിച്ച യുവാവ് പോക്‌സോ നിയമപ്രകാരം അറസ്റ്റില്‍. കൊയ്യം സ്വദേശി എ വി അബ്ദുൽ വാഹിദാണ് പോലീസ് പിടിയിലായത്. എസി മെക്കാനിക്കായ അബ്ദുൾ വാഹിദിന്റെ വലയിൽ 46 പെൺകുട്ടികൾ കുടുങ്ങിയിട്ടുണ്ട് എന്നാണ് പൊലീസിന് ലഭിച്ച വിവരം.

പ്ലസ്ടു വിദ്യാർഥിനികളാണ് കൂടുതലായി വാഹിദിന്റെ വലയിൽ വീണിട്ടുള്ളത്. മൊബൈൽ റീചാർജിങ് കേന്ദ്രങ്ങളിൽ നിന്നാണ് പെൺകുട്ടികളുടെ നമ്പർ സംഘടിപ്പിക്കുന്നത്. സാമൂഹിക മാധ്യമങ്ങൾ വഴിയും ഇയാൾ ചില പെൺകുട്ടികളുമായി അടുപ്പത്തിലായിട്ടുണ്ട്. വലയിൽ കുടുങ്ങിയ പെൺകുട്ടികളിൽ ചിലർ കണ്ണൂർ ജില്ലയ്ക്ക് പുറത്തുള്ളവരാണ്. കുടുംബവിവരങ്ങള്‍ കൂടി ശേഖരിച്ചാണ് തന്ത്രപരമായി ഇരകളെ കുടുക്കുന്നത്.

കഴിഞ്ഞ 20-നാണ് പെണ്‍കുട്ടിയെ കൊളത്തൂരിലെ റബ്ബര്‍ തോട്ടത്തിലെത്തിച്ച് വാഹിദ് പീഡിപ്പിച്ചത്. ഷെയര്‍ചാറ്റ് വഴി പരിചയപ്പെട്ട ഒന്‍പതാം ക്ലാസ് വിദ്യാര്‍ത്ഥിനിയെയാണ് സ്‌കൂളില്‍ പോകാന്‍ ബസ് കാത്തിരിക്കുന്നതിനിടെ പ്രലോഭിപ്പിച്ച് കൊണ്ടുപോയത്.

ഹുസൈന്‍ കരിമ്പം എന്ന പേരിലാണ് ഇയാള്‍ പെണ്‍കുട്ടിയുമായി ബന്ധം സ്ഥാപിച്ചത്. പോലീസ് സൈബര്‍ സെല്‍ വഴി നടത്തിയ അന്വേഷണത്തിലാണ് പ്രതി വാഹിദ് ആണെന്ന് തിരിച്ചറിഞ്ഞത്.

എട്ടാം ക്ലാസ് മുതലുള്ള കുട്ടികളുമായി നിരന്തരം ചാറ്റ് ചെയ്യുകയും പിന്നീട് ഇവരെ ലൈംഗികമായി ദുരുപയോഗം ചെയ്യുന്നതുമായി പോലീസ് സംശയിക്കുന്നു.

ചില പെൺകുട്ടികളുടെ നഗ്നദൃശ്യങ്ങൾ പകർത്തിയതായും പോലീസ് കണ്ടെത്തി. ചാറ്റിങ്ങിൽ ഏർപ്പെടുന്ന പെൺകുട്ടികൾക്ക് അശ്ലീലദൃശ്യങ്ങൾ ഇയാൾ അയച്ചു നൽകുന്നതായും മൊബൈൽ ഫോൺ പരിശോധനയിൽ നിന്ന് പോലീസിന് വ്യക്തമായിട്ടുണ്ട്.

പോലീസിൻറെ സൈബർ സെൽ നടത്തിയ അന്വേഷണത്തിലാണ് പ്രതി പിടിയിലായത്. തേര്‍ളായി കടവിന് സമീപം ഉണ്ടെന്ന് വ്യക്തമായതോടെ തെരച്ചില്‍ തുടങ്ങിയെങ്കിലും കണ്ടെത്താനായില്ല. പിന്നീടാണ് ബോട്ട്കടവിന് സമീപത്തെ ഇയാളുടെ ബന്ധുവിന്റെ പൊളിഞ്ഞുകിടക്കുന്ന കടയില്‍ ഒളിച്ചിരിക്കുന്നുണ്ടെന്ന് പോലീസിന് വിവരം ലഭിച്ചത്.