പ്രണയത്തിൽനിന്ന് പിൻമാറി; ആൺസുഹൃത്തിനുനേരെ പെൺകുട്ടിയുടെ ആസിഡാക്രമണം

ന്യൂഡൽഹി: പ്രണയ ബന്ധത്തിൽനിന്ന് പിൻമാറിയ ആൺസുഹൃത്തിനുനേരെ പെൺകുട്ടിയുടെ ആസിഡാക്രമണം. മൂന്നു വർഷത്തെ പ്രണയത്തിനൊടുവിൽ തന്നെ വിവാഹം കഴിക്കണമെന്ന ആവശ്യം യുവാവ് തള്ളിയതാണ് പെൺകുട്ടിയെ പ്രകോപിതയാക്കിയത്. ബൈക്കിൽ യാത്ര ചെയ്യവെയാണ് പെൺകുട്ടി യുവാവിന്‍റെ മുഖത്ത് ആസിഡ് ഒഴിച്ചതെന്ന് ഡൽഹി ഡിസിപി മോണിക്ക ഭരദ്വാജ് പറഞ്ഞു.

സംഭവത്തിൽ യുവാവിന് മുഖത്തിന്‍റെ വലതുഭാഗവും കഴുത്തും നെഞ്ചും പൊള്ളലേറ്റിട്ടുണ്ട്. ഇയാളെ ഡൽഹിയിലെ ആശുപത്രിയിൽ പ്രവേശിപ്പിച്ചിരിക്കുകയാണ്. പൊലീസ് ചോദ്യം ചെയ്യലിൽ പെൺകുട്ടി കുറ്റം സമ്മതിച്ചിട്ടുണ്ട്.

ബൈക്കിൽ സഞ്ചരിക്കുകയായിരുന്ന യുവാവിനും പെൺകുട്ടിക്കും നേരെ അജ്ഞാതർ ആസിഡാക്രമണം നടത്തിയെന്ന പരാതിയിലാണ് വഴിത്തിരിവുണ്ടായത്. പൊലീസ് നടത്തിയ അന്വേഷണത്തിൽ ബൈക്കിന് പിന്നിലിരുന്ന പെൺകുട്ടി തന്നെയാണ് വാഹനമോടിച്ച യുവാവിന്‍റെ മുഖത്ത് ആസിഡ് ഒഴിച്ചതെന്ന് വ്യക്തമായി.

സംസാരം അലോസരപ്പെടുത്തുന്നുവെന്ന് പറഞ്ഞാണ് യുവാവിന്‍റെ ഹെൽമെറ്റ് പെൺസുഹൃത്ത് ഊരിവെപ്പിച്ചത്. ഇതിനുശേഷമായിരുന്നു ആസിഡാക്രമണം.