പോൺ വെബ്സൈറ്റിൽ കോളേജ് വിദ്യാർഥിനികളുടെ ചിത്രം പോസ്റ്റുചെയ്തു; ബംഗളുരുവിൽ രണ്ടുപേർ അറസ്റ്റിൽ

ബംഗളൂരു: കോളേജ് വിദ്യാർഥിനികളുടെ 30 ഓളം ചിത്രങ്ങൾ അശ്ലീല വെബ്‌സൈറ്റായ എക്സ്ഹാംസ്റ്ററിൽ അപ്‌ലോഡ് ചെയ്തതിന് രണ്ടുപേരെ പൊലീസ് അറസ്റ്റ് ചെയ്തു. ബംഗളുരുവിലാണ് സംഭവം.

കോളേജ് പെൺകുട്ടികളുടെ ഫോട്ടോകൾ അപ്‌ലോഡ് ചെയ്തതിന് വിവര സാങ്കേതിക നിയമത്തിലെ 66, 67 വകുപ്പുകൾ പ്രകാരം അജയ് രാജഗോപാൽ, വിഷ്കത്ത് എന്നിവരെ അറസ്റ്റ് ചെയ്തതായി ക്രൈംബ്രാഞ്ച് ഡെപ്യൂട്ടി പോലീസ് കമ്മീഷണർ കുൽദീപ് ജെയിൻ പറഞ്ഞു.

ഇരകളുടെ ഫോട്ടോകൾ സോഷ്യൽ മീഡിയ അക്കൗണ്ടുകളിൽ നിന്ന് എടുത്തതാണെന്ന് ജോയിന്റ് പോലീസ് കമ്മീഷണർ സന്ദീപ് പാട്ടീൽ പറഞ്ഞു. ഈ കേസിൽ എട്ട് എഫ്ഐആർ രജിസ്റ്റർ ചെയ്തിട്ടുണ്ട്.

ഒരു കോളേജ് വിദ്യാർത്ഥിനി കേസിൽ പ്രതിയായ വിഷ്കത്ത് രാജഗോപാലിന്‍റെ(37) വ്യാജ അക്കൌണ്ടുമായി സോഷ്യൽ മീഡിയയിൽ ചാറ്റ് ചെയ്യാറുണ്ടായിരുന്നു. പെൺകുട്ടിയെന്ന വ്യാജേനയാണ് വിഷ്കത്ത് സംസാരിച്ചിരുന്നത്. ഇരുവരും തമ്മിൽ നിരവധി തവണ സംസാരിച്ചിരുന്നെങ്കിലും പരസ്പരം കണ്ടിരുന്നില്ല. അടുപ്പം ഭാവിച്ച് പെൺകുട്ടിയുടെ സ്വകാര്യചിത്രങ്ങൾ വിഷ്ക്കത്ത് വാങ്ങിച്ചെടുക്കുകയായിരുന്നു. ഇതിനുശേഷമാണ് പോൺ വെബ്സൈറ്റിൽ ചിത്രങ്ങൾ അപ്ലോഡ് ചെയ്തത്.

പരാതി വന്നതോടെയാണ് അന്വേഷണം ക്രൈംബ്രാഞ്ച് ഏറ്റെടുത്തത്. അന്വേഷണത്തിൽ പ്രതികളെക്കുറിച്ചു വിവരം ലഭിക്കുകയും കസ്റ്റഡിയിലെടുക്കുകയും ചെയ്യുകയായിരുന്നു.

ഇതേത്തുടർന്ന് പോൺ സൈറ്റുകളിൽനിന്ന് പെൺകുട്ടികളുടെ ചിത്രങ്ങൾ നീക്കം ചെയ്യുകയായിരുന്നു. കോടതിയിൽ ഹാജരാക്കിയ പ്രതികളെ കൂടുതൽ ചോദ്യം ചെയ്യുന്നതിനായി പൊലീസ് കസ്റ്റഡിയിൽ വാങ്ങിയിട്ടുണ്ട്.