ചിട്ടി കമ്പനിയുടെ സിം കാർഡ് ബ്ലോക്ക് ചെയ്തു; അതേപേരിൽ ഡ്യൂപ്ലിക്കറ്റ് സിം സംഘടിപ്പിച്ച് തട്ടിയെടുത്തത് 44 ലക്ഷം രൂപ

തൃശൂർ: സ്വകാര്യ ചിട്ടിക്കമ്പനിയുടെ ബാങ്ക് അക്കൗണ്ടിൽ നിന്നും ഓൺലൈൻ തട്ടിപ്പുകാർ കവർന്നത് 44 ലക്ഷം രൂപ. ചിട്ടി കമ്പനിയുടെ രണ്ട് അക്കൗണ്ടുകളിൽ നിന്നാണ് ഇത്രയും പണം തട്ടിയെടുത്തത്. ബാങ്ക് അക്കൗണ്ടുകളുമായി ബന്ധിപ്പിച്ചിരുന്ന സിം കാർഡ് ബ്ലോക്ക് ചെയ്ത ശേഷം അതേപേരിൽ ഡ്യൂപ്ലിക്കറ്റ് സിം തരപ്പെത്തിയാണ് തട്ടിപ്പ് നടത്തിയത്. സിം കാർഡിൽ ലഭിച്ച ഒടിപി ഉപയോഗിച്ച് 11 തവണകളായാണ് 44 ലക്ഷം പിൻവലിച്ചത്.

ചിട്ടിക്കമ്പനിയുടെ പേരിൽ സ്വകാര്യ, പൊതുമേഖലാ ബാങ്കുകളിലായി 2 ഓവർ ഡ്ര‍ാഫ്റ്റ് അക്കൗണ്ടുകളുണ്ട്. മാനേജരുടെ പേരിലെടുത്ത സിം കാർഡുകളാണ് ഈ അക്കൗണ്ടുകളുമായി ബന്ധിപ്പിച്ചിരിക്കുന്നത്. ഇതിൽ നിന്നാണ് പണം നഷ്ടമായത്.

ഡൽഹിയിലും കൊൽക്കത്തയിലുമുള്ള ബാങ്ക് അക്കൗണ്ടുകളിലേക്കാണ് പണം പോയിരിക്കുന്നതെന്ന് പൊലീസ് കണ്ടെത്തിയിട്ടുണ്ട്. ജാർഖണ്ഡ് കേന്ദ്രീകരിച്ചു പ്രവർത്തിക്കുന്ന സൈബർ തട്ടിപ്പു സംഘമാണ് പുതിയതരം തട്ടിപ്പിനു പിന്നിലെന്നാണ് പൊലീസിന‍്റെ സംശയം.

സിം കാർഡ് പ്രവർത്തന രഹിതമാണെന്ന് ഏതാനും ദിവസം മുൻപു മാനേജരുടെ ഫോണിലേക്ക് മൊബൈൽ കമ്പനിയുടെ സന്ദേശം ലഭിച്ചിരുന്നു. ഇതിനു പിന്നാലെ കമ്പനിയുമായി ബന്ധപ്പെട്ടപ്പോഴാണ് സിം കാർഡ് ബ്ലോക്ക് ചെയ്യപ്പെട്ടെന്നു മനസിലായത്.

കൂടുതൽ അന്വേഷണത്തിൽ ഇതേ പേരിൽ ജാർഖണ്ഡിൽ നിന്ന് ആരോ ഡ്യൂപ്ലിക്കറ്റ് സിം എടുത്തിട്ടുണ്ടെന്നും കണ്ടെത്തി. യഥാർഥ രേഖകൾ ഹാജരാക്കി മാനേജർ വീണ്ടും ഡ്യൂപ്ലിക്കറ്റ് സിം കാർഡ് റജിസ്റ്റർചെയ്തപ്പോഴേക്കും 10 തവണകളായി 34 ലക്ഷം രൂപ പിൻവലിക്കപ്പെട്ടിരുന്നു. ഉ

ടനടി പൊതുമേഖലാ ബാങ്കിലെത്തി ഈ അക്കൗണ്ട് ബ്ലോക്ക് ചെയ്യാൻ ശ്രമിച്ചെങ്കിലും ഇതിനകം 10 ലക്ഷം രൂപ കൂടി നഷ്ടമായി.