നിധി കണ്ടെത്താൻ ആഭിചാരകർമ്മം; നാലര ലക്ഷം തട്ടിയെടുത്തെന്ന യുവതിയുടെ പരാതിയിൽ കേസെടുത്തു

കണ്ണൂർ: നിധിയുണ്ടെന്ന് വിശ്വസിപ്പിച്ച് ലക്ഷങ്ങൾ തട്ടിയെടുത്തുവെന്ന പരാതിയിൽ എട്ടുപേർക്കെതിരെ പൊലീസ് കേസെടുത്തു. കണ്ണൂർ പയ്യന്നൂരിലാണ് സംഭവം. കാറമേലിലെ കൊവൽ മുപ്പന്റകത്ത് ജമീലയുടെ പരാതിയിലാണ് നടപടി.

ചെറുപുഴയിലെ എം.ടി.പി. റഷീദ്, മാതാവ് സൈനബ,ഭാര്യ അശിഫ, സഹോദരങ്ങളായ ഷർഫുദ്ദീൻ, പി ഷംസു, നിസാം, ഉസ്താദ് അബുഹന്ന, കാസർഗോഡ് തങ്ങൾ എന്നിവർക്കെതിരെയാണ് പയ്യന്നൂർ പോലീസ് കേസെടുത്തത്. 2022 ജനുവരി മുതൽ ജൂൺ വരെ കാലയളവിൽ, നാലര ലക്ഷത്തോളം രൂപ തട്ടിയെടുത്തു എന്നാണ് ജമീലയുടെ പരാതി.

നിധി കണ്ടെത്തി നൽകാനും കുടുംബ കലഹം ഒഴിവാക്കാനുമുള്ള പൂജകർമ്മങ്ങൾക്കായാണ് പണം വാങ്ങിയത്. ഫലം ലഭിച്ചില്ലെങ്കിൽ പണം തിരികെ നൽകുമെന്ന വാഗ്ദാനവും സംഘം നൽകിയിരുന്നു. പണം കൈക്കലാക്കിയതിനു പുറമേ ലൈംഗിക ചൂഷണം നടത്താനും സംഘം ശ്രമിച്ചുവെന്ന് ജമീല പറയുന്നു.

തുടർന്നാണ് ജമീല ബന്ധുക്കളെ വിവരമറിയിച്ചത്. ജൂൺ 22ന് രാത്രി വീണ്ടും കർമ്മങ്ങൾക്കായി എത്തിയ സംഘത്തിന്റെ ഫോട്ടോ ബന്ധുക്കൾ പകർത്തി. ഇതോടെ വാക്കുതർക്കം ആവുകയും സംഘം സ്ഥലത്തുനിന്നും രക്ഷപ്പെടുകയും ചെയ്തു. പണം വാങ്ങി വഞ്ചിച്ച ശേഷം ജീവഹാനി വരുത്തുകയായിരുന്നു സംഘത്തിന്റെ ലക്ഷ്യം എന്ന് ജമീല പറയുന്നു.

പരാതിയിൽ കേസെടുത്ത് പോലീസ് അന്വേഷണം ആരംഭിച്ചു. 420 വകുപ്പ് പ്രകാരം വഞ്ചന കുറ്റമാണ് പ്രതികൾക്കെതിരെ ചുമത്തിയിട്ടുള്ളത്.