കാമുകിയെ കാണാനെത്തിയത് മോഷ്ടിച്ച ബൈക്കുകളിൽ; 5 ആഡംബര ബൈക്കുകളുമായി യുവാക്കൾ അറസ്റ്റിൽ

കൊച്ചി: കാമുകിയെ കാണാൻ മോഷണ ബൈക്കുകളിലെത്തിയ പ്രായപൂർത്തിയാകാത്തവർ ഉൾപ്പെടെ അഞ്ച് പേർ പിടിയിൽ. കാലടിയിൽ വച്ചാണ് മോഷ്ടാക്കൾ 5 ആഡംബര ബൈക്കുകളുമായി പൊലീസിന്റെ പിടിയിലായത്. പാലക്കാട് ചിറ്റൂർ കല്ലാട്ടേരി പള്ളിപ്പുറം വെർക്കോലി വീട്ടിൽ വിജയ് (20) ചിറ്റൂർ എളപ്പുള്ളി മാമ്പുള്ളി വീട്ടിൽ സുബിൻ (22) തൃശൂർ അളകപ്പനഗർ വരക്കാര കപ്പേള നെടുവേലിക്കുടി വീട്ടിൽ ബിന്റോ (25) എന്നിവരും പ്രായപൂർത്തിയാകാത്ത രണ്ടുപേരുമാണ് പൊലീസിന്റെ വലയിലായത്.

വാഹന പരിശോധനക്കിടയിലാണ് രണ്ടു ബൈക്കുകളിലായി അഞ്ച് പേർ വരുന്നത് പൊലീസിന്റെ ശ്രദ്ധയിൽപ്പെട്ടത്. ഈ ബൈക്കുകൾക്ക് നമ്പർ പ്ലേറ്റില്ലായിരുന്നു. കൈകാണിച്ചതോടെ ബൈക്കുപേക്ഷിച്ച് ഓടി രക്ഷപ്പെടാൻ ശ്രമിച്ചു. ഇതേത്തുടർന്ന് പൊലീസ് ഇവരെ പിന്തുടർന്ന് പിടികൂടി ചോദ്യം ചെയ്തപ്പോഴാണ് ബൈക്ക് മോഷണത്തിന്റെ ചുരളഴിയുന്നത്.

സംഘത്തിലുണ്ടായിരുന്ന പ്രായപൂർത്തിയാകാത്ത ആളുടെ മലയാറ്റൂരുള്ള കാമുകിയെ കാണാനെത്തിയതായിരുന്നു സംഘം. സംസ്ഥാനത്തിന്റെ വിവിധ ഭാഗങ്ങളിൽ നിന്ന് നിരവധി ബൈക്കുകൾ ഇവർ മോഷ്ടിച്ചിട്ടുണ്ടെന്നും ഇവ വിറ്റുകിട്ടുന്ന പണം ലഹരി ഉപയോഗിക്കാനും ആഡംബര ജീവിതത്തിനുമാണ് ചിലവിടുന്നതെന്നും പോലീസ് പറഞ്ഞു.

സംഘത്തിലെ പ്രായപൂർത്തിയാകാത്ത ഒരാൾ മെക്കാനിക്കാണ്. ലോക്ക് ചെയ്ത് നിർത്തിയിട്ടിരിക്കുന്ന ബൈക്ക് വിദഗ്ധമായി സ്റ്റാർട്ട് ചെയ്ത് പുറത്തെത്തിക്കുന്നത് ഇയാളാണ്.

യുവാക്കൾക്ക് പിന്നിൽ വൻ സംഘം പ്രവർത്തിക്കുന്നുണ്ടെന്നും ഇതേക്കുറിച്ച് അന്വേഷിക്കാൻ പ്രത്യേകസംഘത്തിന് രൂപം നൽകിയെന്നും ജില്ലാ പോലീസ് മേധാവി കെ. കാർത്തിക് ഐ.പി.എസ്. പറഞ്ഞു.

കാലടി എസ്.എച്ച്. ഒ എം.ബി. ലത്തീഫ്,അയ്യമ്പുഴ എസ്.എച്ച്. ഒ.തൃദീപ് ചന്ദ്രൻ, എസ്. ഐ മാരായ സ്റ്റെപ്റ്റോ ജോൺ, ജയിംസ് മാത്യു, എ.എസ്.ഐ അബ്ദുൾ സത്താർ എം.കെ, സിവിൽ പോലീസ് ഉദ്യോഗസ്ഥരായ അനിൽകുമാർ എൻ.പി, സെബാസ്ഖറ്റിയൻ സി.ഡി, മാഹിൻഷാ, മനോജ് കുമാർ ടി.എൻ, നൗഫൽ കെ.എ. എന്നിവരാണ് അന്വേഷണ സംഘത്തിലുള്ളത്.