നഗ്നതാ പ്രദർശനമെന്ന് തെറ്റിദ്ധരിച്ച് മർദനം; ആൾക്കൂട്ട ആക്രമണത്തിൽ ദളിത് യുവാവിന് ദാരുണാന്ത്യം

ചെന്നൈ: ആൾക്കൂട്ട ആക്രമണത്തിൽ ദളിത് യുവാവിന് ദാരുണാന്ത്യം. തമിഴ്‌നാട്ടിലെ വിഴുപുരം ജില്ലയിലാണ് ദളിത് യുവാവിനെ ആള്‍ക്കൂട്ടം മര്‍ദിച്ചുകൊന്നത്. സംഭവത്തില്‍ മൂന്നു സ്ത്രീകളടക്കം ഏഴുപേരെ പൊലീസ് അറസ്റ്റുചെയ്തു. സംഭവത്തിന്റെ വീഡിയോ ദൃശ്യങ്ങൾ പുറത്തുവന്നതിനു പിന്നാലെയാണ് അറസ്റ്റ്.

കാരൈ ഗ്രാമത്തിൽ താമസിക്കുന്ന ശക്തിവേൽ എന്ന 24കാരനാണ് കൊല്ലപ്പെട്ടത്. ഫെബ്രുവരി 12നാണ് സംഭവം ഉണ്ടായത്. പെട്രോള്‍ പമ്പ് ജീവനക്കാരനായ ശക്തിവേല്‍ ഉച്ചഭക്ഷണശേഷം ജോലിസ്ഥലത്തേക്ക് മടങ്ങുന്നതിനിടെയായിരുന്നു സംഭവം.

പെട്രോള്‍ തീര്‍ന്നതിനാല്‍ പാതിവഴിയില്‍ ബൈക്ക് നിന്നുപോയിരുന്നു. പിന്നീട് ബൈക്ക് തള്ളിക്കൊണ്ടുപോയ യുവാവ് ഈ വിവരം ഫോണില്‍ വിളിച്ച് വീട്ടില്‍ അറിയിച്ചിരുന്നു. വയറുവേദന അനുഭവപ്പെടുന്നതായും സഹോദരിയോട് പറഞ്ഞിരുന്നു.

വേദന കലശലായതോടെ അടുത്തുള്ള തോട്ടത്തില്‍ പോയി മലവിസര്‍ജനം നടത്തിയശേഷം വസ്ത്രം ധരിക്കുന്നതിനിടെ ശക്തിവേലിനെ തോട്ടത്തിലുണ്ടായിരുന്ന സ്ത്രീ കണ്ടു. ഇയാള്‍ നഗ്‌നത പ്രദര്‍ശിപ്പിക്കുകയാണെന്നു തെറ്റിദ്ധരിച്ച ഇവര്‍ ബഹളംവെച്ച് ആളെക്കൂട്ടി. ഓടിയെത്തിയ ഇവരുടെ ഭര്‍ത്താവും മറ്റ് അഞ്ചുപേരും യുവാവിനെ മര്‍ദിച്ചു.

സംഭവത്തെ കുറിച്ച് അറിഞ്ഞ് ശക്തിവേലിന്റെ സഹോദരി ഇവിടെ എത്തി. പൊലീസ് എത്തി ശക്തിവേലിനെ ഇവർക്കൊപ്പം വിട്ടയച്ചു. എന്നാൽ വഴിയിൽ വെച്ച് ശക്തിവേൽ കുഴഞ്ഞുവീഴുകയായിരുന്നു. ആശുപത്രിയിലെത്തിച്ചപ്പോഴേക്കും മരിച്ചു.

സംഭവത്തില്‍ ശക്തിവേലിന്റെ സഹോദരിയുടെ പരാതിപ്രകാരം കേസെടുത്ത പോലീസ് ഏഴു പ്രതികളെ പിടികൂടി. ലൈംഗികാതിക്രമത്തിന് മുതിരുകയാണെന്നു തെറ്റിദ്ധരിച്ചാണ് ആക്രമണം നടത്തിയതെന്നാണ് പ്രതികൾ നൽകിയ മൊഴി. ഉന്നത ജാതിക്കാരനായ ആളുടെ പറമ്പിൽ ദളിതനായ യുവാവ് മലവിസർജനം നടത്തിയതാണ് കൊലയ്ക്ക് കാരണമെന്നും സംശയിക്കുന്നുണ്ട്.