മകനെ പിതാവ് കൊലപ്പെടുത്തി; കണ്ടുനിന്ന മുത്തശ്ശി കുഴഞ്ഞുവീണു മരിച്ചു

കോട്ടയം: മദ്യ ലഹരിയിൽ പിതാവിനെ മർദിച്ച മകനെ കൊന്ന് കൊക്കയിൽ തള്ളിയ പിതാവ് അറസ്റ്റില്‍. കൊലപാതകത്തിന് ദൃക്സാക്ഷിയായ പിതാവിൻറെ അമ്മ കുഴഞ്ഞു വീണു മരിച്ചു.

മൂന്നിലവ് കൊന്നയ്ക്കലിൽ ജോൺസൺ ബേബിയാണ് കൊല്ലപ്പെട്ടത്. സംഭവത്തിൽ പിതാവ് ചാക്കോയാണ് അറസ്റ്റിലായത്. കൊലപാതകത്തിന് സാക്ഷിയായ ചാക്കോയുടെ മാതാവ് മറിയാമ്മയാണ് കുഴഞ്ഞുവീണ് മരിച്ചത്.

മേലുകാവ് കോണിപ്പാട് ഇരുമാപ്ര റോഡിൽ പള്ളിക്ക് സമീപം കൊക്കയിൽ 20 അടിയോളം താഴ്ചയിൽ അജ്ഞാത മൃതദേഹം കണ്ടെത്തിയ സംഭവത്തിൽ പൊലീസ് നടത്തിയ അന്വേഷണത്തിലാണ് കൊലപാതക വിവരം പുറത്തു വന്നത്.

മൃതദേഹത്തിന് രണ്ടു ദിവസത്തിലേറെ പഴക്കം ഉണ്ടായിരുന്നു. വയറിൽ പ്ലാസ്റ്റിക് കയർ കെട്ടിയ നിലയിലായിരുന്നു മൃതദേഹം കണ്ടെത്തിയത്.

സ്ഥിരം മദ്യപാനിയും ലഹരിക്ക് അടിമയുമായിരുന്ന ജോൺസൺ വെള്ളറയിലെ വീട്ടിലായിരുന്നു താമസം. വിവാഹിതനും ഒരു കുട്ടിയുടെ പിതാവുമായ ഇയാളുടെ മദ്യപിച്ചുള്ള ശല്യവും ഉപദ്രവവും സഹിക്കാൻ വയ്യാതെ ഭാര്യ കുഞ്ഞുമായി പിണങ്ങിപ്പോയിരുന്നു.

ഇയാളുടെ ശല്യം സഹിക്കാൻ വയ്യാതെ അച്ഛൻ ചാക്കോയും ഭാര്യയും ചാക്കോയുടെ അമ്മയും വാടക വീട്ടിലായിരുന്നു താമസിച്ചിരുന്നത്.കഴിഞ്ഞ ഒമ്പതിന് ചാക്കോയുടെ വീട്ടിലെത്തിയ ജോൺസൺ ചാക്കോയുമായി വഴക്കിട്ടു. ഗതികെട്ട ചാക്കോ കമ്പിവടി കൊണ്ട് ജോൺസന്റെ കാലിൽ അടിച്ചു.

ഇതിൽ വൈരാഗ്യം തോന്നിയ ജോൺസൻ 11ന് വീട്ടിലെത്തി ചാക്കോയുമായി വഴക്കിട്ടു. ഇതിനിടെയാണ് ചാക്കോ ജോൺസനെ തലക്കടിച്ച് കൊന്നത്. ഇതിന് ചാക്കോയുടെ ഭാര്യയും അമ്മയും സാക്ഷികളായിരുന്നു. ഇതിനിടെയാണ് ചാക്കോയുടെ അമ്മ കുഴഞ്ഞു വീണത്. ഇവരെ ചാക്കോയും ഭാര്യയും ചേർന്ന് ആശുപത്രിയിലെത്തിച്ചെങ്കിലും രക്ഷിക്കാനായില്ല.

അമ്മയുടെ മൃതദേഹം സഹോദരന്റെ വീട്ടിലെത്തിച്ച ശേഷം ചാക്കോ തിരികെ വാടക വീട്ടിലെത്തി. ജോൺസന്റെ മൃതദേഹം പ്ലാസ്റ്റിക് കയർ കൊണ്ട് കെട്ടി കൊക്കയിൽ തള്ളുകയായിരുന്നു. ഇതിനു ശേഷം അമ്മയുടെ സംസ്കാരച്ചടങ്ങിലും പങ്കെടുത്തു.

ജോൺസനും ചാക്കോയും തമ്മിൽ വഴക്കുണ്ടായതായി പൊലീസിന് വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ ചോദ്യം ചെയ്യലിലാണ് കൊലപാതകത്തെ കുറിച്ച് വിവരം ലഭിച്ചത്.