മകളെ പീഡിപ്പിച്ച് ഗർഭിണിയാക്കിയ പിതാവിന് മരണം വരെ കഠിനതടവ്; ബംഗാളിയാണെന്ന് പറയാൻ പ്രേരിപ്പിച്ചു

കോട്ടയം: മാനസിക വെല്ലുവിളി നേരിടുന്ന പ്രായപൂർത്തിയാകാത്ത മകളെ 2018ലെ പ്രളയസമയത്ത് പീഡിപ്പിച്ച് ഗർഭിണിയാക്കിയ കേസിൽ കോട്ടയം പോക്സോ കോടതി പിതാവിന് മരണം വരെ കഠിനതടവ് ശിക്ഷ വിധിച്ചു. വെള്ളൂർ സ്വദേശിയായ പിതാവിനെയാണ് കോടതി കുറ്റക്കാരനെന്ന് കണ്ടെത്തി ശിക്ഷ വിധിച്ചത്.

പ്രതി അരലക്ഷം രൂപ പിഴ വിധിക്കണമെന്നും കോടതി വിധിച്ചു. കൂടാതെ ഇരയായ പെൺകുട്ടിക്ക് വിക്ടിം കോംപൻസേഷൻ ഫണ്ടിൽ നിന്നും നഷ്ടപരിഹാരം നൽകണമെന്നും വിധിയിൽ പറയുന്നു. വെള്ളൂർ പൊലീസ് സ്റ്റേഷൻ പരിധിയിലെ വീട്ടിൽ വെച്ചായിരുന്നു പീഡനം.

15 വയസുകാരിയുടെ അമ്മ നേരത്തെ മരിച്ചിരുന്നു. തുടർന്ന് അച്ഛന്റെ സംരക്ഷണയിലാണ് പെൺകുട്ടി കഴിഞ്ഞിരുന്നത്. വീട് തകർന്നതോടെ ഇവർ സുഹൃത്ത് താമസിക്കുന്ന അപ്പാർട്ട്മെന്റിലേക്ക് മാറി.

ഇതിനിടെ കുട്ടിക്ക് ശാരീരിക അസ്വസ്ഥത അനുഭവപ്പെട്ടതിനാൽ പരിശോധന നടത്തിയപ്പോഴാണ് ഗർഭിണിയാണെന്ന് കണ്ടെത്തിയത്. പെൺകുട്ടി ഗർഭിണിയാണെന്ന് അറിഞ്ഞപ്പോൾ അടുത്തുള്ള ബംഗാളിയാണെന്ന് പറയാൻ പ്രേരിപ്പിച്ചിരുന്നു. അതനുസരിച്ച് അനിൽ എന്ന ഇതരസംസ്ഥാനക്കാരനെതിരെ പൊലീസ് കേസെടുക്കുകയും ചെയ്തു.

എന്നാൽ മൊഴിയിലെ വൈരുധ്യത്തെ തുടർന്ന് പെണ്‍കുട്ടിയെ കൊച്ചിയിലെ നിർഭയ കേന്ദ്രത്തിലെത്തിച്ച് കൗൺസിലിങ്ങിന് വിധേയമാക്കിയപ്പോഴാണ് പിതാവ് തന്നെയാണ് പീഡിപ്പിച്ചതെന്ന് വെളിവായത്.