നാലു പെൺമക്കളെ നിരന്തരം പീഡിപ്പിച്ച അച്ഛൻ അറസ്റ്റിൽ; ഇളയമകൾക്ക് 10 വയസ്; വീട്ടുജോലിക്ക് പോയ അമ്മ ഒന്നുമറിഞ്ഞില്ല

മലപ്പുറം: വളാഞ്ചേരിയിൽ നാല് പെൺമക്കളെ ലൈംഗികമായി പീഡിപ്പിച്ച അച്ഛൻ പൊലീസ് പിടിയിൽ. 47കാരനായ പ്രതി തന്‍റെ 17, 15, 13, 10 വയസ് പ്രായമുള്ള പെൺമക്കളെയാണ് കഴിഞ്ഞ ഒരു വർഷത്തോളമായി പലവട്ടം ശാരീരികമായി പീഡിപ്പിച്ചത്. ഹോസ്റ്റലിൽ താമസിച്ച് പഠിക്കുകയായിരുന്ന കുട്ടികൾ അച്ഛൻ ഉപദ്രവിക്കുന്ന കാര്യം ആദ്യം പറഞ്ഞത് സ്കൂൾ ഹോസ്റ്റൽ അധികൃതരോട് ആയിരുന്നു.

അവധി ദിവസങ്ങളിൽ വീട്ടിൽ പോകാൻ മടിച്ചിരുന്ന കുട്ടികളോട് കാര്യം അന്വേഷിച്ചപ്പോളാണ് അച്ഛന്‍റെ ക്രൂരതകൾ ഹോസ്റ്റൽ അധികൃതർ അറിഞ്ഞത്. തന്നെ അനുസരിക്കാൻ വയ്യെങ്കിൽ വീട്ടിലേക്ക് വരേണ്ടെന്ന് ഇയാൾ കുട്ടികളെ ഭീഷണിപ്പെടുത്തുകയും ചെയ്തിരുന്നു. ഒരു വർഷം മുമ്പാണ് പ്രതി കുട്ടികളെ ശാരീരികമായി ഉപദ്രവിക്കാൻ തുടങ്ങിയത്.

വീട്ടുജോലികൾക്ക് പോയിരുന്നതിനാൽ കുട്ടികളുടെ അമ്മ ഇക്കാര്യങ്ങൾ ഒന്നും അറിഞ്ഞിരുന്നില്ല എന്നാണ് പൊലീസ് പറയുന്നത്. ഇവർ വീട്ടിൽ ഇല്ലാത്ത സമയത്തായിരുന്നു അതിക്രമങ്ങൾ. പഠനം പൂർത്തിയാക്കിയ 17കാരിയായ മൂത്ത മകളാണ് ഏറ്റവുമധികം ലൈംഗിക അതിക്രമങ്ങൾക്ക് ഇരയായത്. ഈ കുട്ടി മാസങ്ങൾ ആയി വീട്ടിൽ തന്നെയായിരുന്നു.

സ്കൂൾ അധികൃതർ വിവരം അറിയിച്ചതിന്‍റെ അടിസ്ഥാനത്തിൽ വളാഞ്ചേരി പൊലീസ് അന്വേഷണം നടത്തി പ്രതിയെ അറസ്റ്റ് ചെയ്യുകയായിരുന്നു. തിരുവനന്തപുരം സ്വദേശിയായ ഇയാൾ ക്വാറി തൊഴിലാളി ആണ്. പ്രതിക്ക് എതിരെ പോക്സോ, ഐപിസി 355 എ വകുപ്പുകൾ പ്രകാരമാണ് കേസ് എടുത്തിരിക്കുന്നത്.