ബിജെപി എംഎൽഎയ്ക്കും കുടുംബത്തിനുമെതിരെ പീഡന കേസ്; യുവതിയെ പീഡിപ്പിച്ചത് 2017 ലെ തെരഞ്ഞെടുപ്പ് കാലത്ത്

ലക്നൗ: പീഡനപരാതിയില്‍ ബിജെപി എംഎല്‍എ രവീന്ദ്രനാഥ് ത്രിപാഠിക്കെതിരെ പൊലീസ് എഫ്‌ഐആര്‍ രജിസ്റ്റര്‍ ചെയ്തു. 2017 ഉത്തര്‍പ്രദേശ് നിയമസഭാ തെരഞ്ഞെടുപ്പ് കാലത്ത് ത്രിപാഠിയും കൂടുബാംഗങ്ങളും പീഡിപ്പിച്ചെന്നാണ് യുവതിയുടെ പരാതി.

പീഡനത്തിനായി ത്രിപാഠിയുടെ സഹോദര പുത്രനാണ് ഹോട്ടലിലേക്ക് കൂട്ടിക്കൊണ്ടുപോയതെന്ന് യുവതി പരാതിയില്‍ പറയുന്നു. തുടര്‍ന്ന് ഒരുമാസം എംഎല്‍എയും കുടുംബാംഗങ്ങളും നിരന്തരം പീഡിപ്പിച്ചുവെന്നും പരാതിയില്‍ പറയുന്നു.

പരാതിയും ആരോപണങ്ങളും അടിസ്ഥാന രഹിതമാണെന്ന നിലപാടിലാണ് ത്രിപാഠി. പരാതി നല്‍കിയത് കൊണ്ട് മാത്രം കാര്യമില്ല, അന്വേഷണം നടക്കട്ടെ. പ്രാഥമികമായ അന്വേഷണത്തില്‍ ആരോപണങ്ങള്‍ ശരിയാണെന്ന് തെളിഞ്ഞാല്‍ താനും തന്റെ കുടുംബവും തൂക്കിലേറാന്‍ വരെ തയാറാണെന്നും എംഎല്‍എ പറഞ്ഞു.

ആരോപണങ്ങള്‍ക്ക് പിന്നില്‍ ഗ്യാന്‍പുര്‍ എംഎല്‍എയായ വിജയ് മിശ്രയാണെന്നും അദ്ദേഹം ആരോപിച്ചു.

ഇതുവരെ 78 ക്രിമിനല്‍ കേസുകളാണ് വിജയ് മിശ്ര തനിക്കെതിരെ നല്‍കിയിട്ടുള്ളതെന്നും അദ്ദേഹം ചൂണ്ടിക്കാട്ടി.