പതിനാലുകാരിയെ തട്ടിക്കൊണ്ടു പോയി ദിവസങ്ങളോളം പീഡനത്തിനിരയാക്കി; ബന്ധു അറസ്റ്റിൽ

ജയ്പുർ: പ്രായപൂർത്തിയാകാത്ത പെൺകുട്ടിയെ തട്ടികൊണ്ടു പോയി ദിവസങ്ങളോളം തുടർച്ചയായി പീഡനത്തിനിരയാക്കിയ 45കാരൻ അറസ്റ്റിൽ. അകന്ന ബന്ധു കൂടിയായ പതിനാലുകാരിയെ തട്ടിക്കൊണ്ടു പോയി തടവിൽ പാർപ്പിച്ചായിരുന്നു പീഡനം.

പെൺകുട്ടിയെ ഇയാൾ നിർബന്ധിച്ച് കെട്ടിട നിർമ്മാണപ്രദേശങ്ങളിൽ ജോലിക്ക് അയച്ചതായും റിപ്പോർട്ടുണ്ട്. രാജസ്ഥാനിലെ ജയ്സാൽമേറിലാണ് ഞെട്ടിക്കുന്ന സംഭവം.

ഇക്കഴിഞ്ഞ ഫെബ്രുവരി പത്തിനാണ് പെൺകുട്ടിയെ കാണാനില്ലെന്ന് കാട്ടി ഇറ്റാവ പൊലീസ് സ്റ്റേഷനിൽ പരാതി ലഭിക്കുന്നത്. തുടർന്ന് അന്വേഷണം ആരംഭിച്ച പൊലീസ് ഇരുപത്തി രണ്ട് ദിവസങ്ങള്‍ക്കൊടുവിൽ കഴിഞ്ഞ ദിവസമാണ് പൊഖ്റാന്‍ മേഖലയിൽ പെൺകുട്ടിയെ കണ്ടെത്തിയത്.

പ്രതി തടവിലാക്കിയിരുന്ന പെൺകുട്ടി തുടർച്ചയായി ബലാത്സംഗത്തിനിരയായി എന്നാണ് പൊലീസ് പറയുന്നത്. കൂടാതെ ജോലി ചെയ്യാൻ നിർബന്ധിച്ചിരുന്നു എന്നാണ് ഇറ്റാവ ഡെപ്യൂട്ടി സൂപ്രണ്ടന്‍റ് വിജയശങ്കർ ശര്‍മ്മ അറിയിച്ചത്.

അറസ്റ്റ് ചെയ്ത പ്രതിയെ കോടതിയിൽ ഹാജരാക്കിയ ശേഷം പൊലീസ് കസ്റ്റഡിയിൽ വിട്ടിരിക്കുകയാണ്. ബലാത്സംഗത്തിന് പുറമെ കുട്ടികൾക്കെതിരായ ലൈംഗിക അതിക്രമങ്ങൾ തടയുന്ന പോക്സോ വകുപ്പ് പ്രകാരമുള്ള കുറ്റങ്ങളും ഇയാൾക്കെതിരെ ചുമത്തിയിട്ടുണ്ട്.

ഇയാളുടെ പിടിയിൽ നിന്നും മോചിപ്പിച്ച പെൺകുട്ടിയെ ശിശുക്ഷേമ കമ്മിറ്റിക്ക് മുന്നിൽ ഹാജരാക്കിയ ശേഷം അഭയകേന്ദ്രത്തിലേക്ക് മാറ്റി.മയക്കുമരുന്ന് നൽകി അബോധാവസ്ഥയിലാക്കിയാണ് പ്രതി തട്ടിക്കൊണ്ടു പോയതെന്നാണ് പെൺകുട്ടി കൗൺസിലിംഗിൽ വെളിപ്പെടുത്തിയതെന്നാണ് കമ്മിറ്റി ചെയര്‍മാൻ കനിസ് ഫാത്തിമ അറിയിച്ചത്