SHOCKING| ഭർത്താവ് തലാഖ് ചൊല്ലി; പിന്നാലെ ഭർതൃപിതാവും ബന്ധുവും യുവതിയെ ബലാത്സംഗം ചെയ്തു

ജയ്പൂർ: ഭർത്താവ് മൂന്നു തവണ തലാഖ് ചൊല്ലിയ അതേദിവസം തന്നെ ഭർതൃപിതാവും അദ്ദേഹത്തിന്റെ സഹോദരനും ചേർന്ന് തന്നെ ക്രൂരമായി ബലാത്സംഗം ചെയ്തതായി യുവതിയുടെ പരാതി. രാജസ്ഥാനിലാണ് ഞെട്ടിക്കുന്ന സംഭവം നടന്നത്.

ഭിവാഡിയിലെ വനിതാ പൊലീസ് സ്റ്റേഷനിൽ രജിസ്റ്റർ ചെയ്ത എഫ്ഐആർ പ്രകാരം, കഴിഞ്ഞ വെള്ളിയാഴ്ച 25കാരിയെ ഭർത്താവ് മൂന്നു തവണ തലാഖ് ചൊല്ലി ബന്ധം ഒഴിഞ്ഞതായി പറയുന്നു.

അതേദിവസം തലാഖിനെ എതിർത്ത തന്നെ ഭർതൃപിതാവും അദ്ദേഹത്തിന്റെ സഹോദരനും ചേർന്ന് ക്രൂരമായി ബലാത്സംഗം ചെയ്തുവെന്നും ഇതിനിടെ ഭർതൃ സഹോദരൻ ക്രൂരമായി മർദിച്ചതായും പൊലീസ് പറയുന്നു.

മുത്തലാഖ് നിയമപ്രകാരം ഭർത്താവിനെതിരെയും മർദിച്ചതിന് ഭർതൃസഹോദരനെതിരെയും കൂട്ടബലാത്സംഗത്തിന് ഭർതൃപിതാവിനും സഹോദരനും എതിരെയും കേസെടുത്തതായി പൊലീസ് അറിയിച്ചു. സംഭവവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ലെന്നും അന്വേഷണം പുരോഗമിക്കുകയാണെന്നും പൊലീസ് വ്യക്തമാക്കി.

കോടതിയുടെ നിർദേശ പ്രകാരം മുത്തലാഖുമായി ബന്ധപ്പെട്ട് മറ്റൊരു കേസും ഇതേ പൊലീസ് സ്റ്റേഷനിൽ ചൊവ്വാഴ്ച രജിസ്റ്റർ ചെയ്തിട്ടുണ്ട്. നവംബർ 17ന് ഭര്‍ത്താവ് ഫോണിലൂടെ മൂന്നു തവണ തലാഖ് ചൊല്ലിയെന്ന് യുവതി ഈ പരാതിയിൽ പറയുന്നു. ഭർത്താവിന്റെ അച്ഛന്റെയും അമ്മയുടെയും മറ്റു ബന്ധുക്കളുടെയും പേരുകളും എഫ്ഐആറിലുണ്ട്. മുത്തലാഖ് നിയമപ്രകാരം ഇവർക്കെതിരെ കേസെടുത്തതായും പൊലീസ് അറിയിച്ചു.