സൂക്ഷിക്കുക, ഗൂഗിൾ പേ വഴി പണം കൈമാറുമ്പോൾ; യുവതിയിൽനിന്ന് ഹാക്കർമാർ ചോർത്തിയത് 71000 രൂപ!

പണ കൈമാറ്റത്തിനായി നിങ്ങൾ ഗൂഗിൾ പേ അല്ലെങ്കിൽ മറ്റ് പേയ്‌മെന്റ് അപ്ലിക്കേഷനുകൾ ഉപയോഗിക്കുന്നുണ്ടോ? അത്തരമൊരു അപ്ലിക്കേഷൻ ഉപയോഗിക്കുകയാണെങ്കിൽ, ശ്രദ്ധിക്കുക! ഹാക്കർമാരുടെ തട്ടിപ്പ് ഇപ്പോൾ ഈ മേഖലയിലായിട്ടുണ്ട്. മുമ്പ് എടിഎം കാർഡ് നമ്പറുകളും പിൻ നമ്പരും ഉപയോഗിച്ച് തട്ടിപ്പ് നടത്തിയിരുന്നവർ ഇപ്പോൾ ഗൂഗിൾ പേ ആണ് താവളമാക്കിയിരിക്കുന്നത്. ഗൂഗിള പേ ഉപയോഗിച്ച് ബാങ്ക് അക്കൌണ്ടിൽനിന്ന് പണം അടിച്ചുമാറ്റുകയാണ് ഹാക്കർമാരുടെ പുതിയ രീതി.

ആസമിലാണ് ഇത്തരത്തിലൊരു തട്ടിപ്പ് ഒടുവിൽ റിപ്പോർട്ട് ചെയ്തിരിക്കുന്നത്. ജൊഹാത് മെഡിക്കൽ കോളേജിലെ കോവിഡ് വാർഡിലെ വനിതാ ഡോക്ടറാണ് തട്ടിപ്പിന് ഇരയായത്.

ഡോക്ടറായ ബിജുറാണി ബർമൻ ആദ്യം 6000 രൂപ ഗൂഗിൾ പേ വഴി ഭർത്താവിന് അയച്ചുകൊടുത്തു. എന്നാൽ അൽപ്പസമയത്തിനകം 14000 രൂപ അക്കൌണ്ടിൽനിന്ന് മാറ്റിയതായി എസ്എംഎസ് ലഭിച്ചു. ഇതോടെയാണ് തട്ടിപ്പ് നടന്ന വിവരം ബിജുറാണി അറിയുന്നത്. ഉടൻതന്നെ അവർ ഗൂഗിൾ പേ കസ്റ്റമർ കെയറിൽ വിളിച്ചു വിവരം പറഞ്ഞു.

എന്നാൽ ഇതിനുശേഷമാണ് വലിയ തോതിൽ പണം നഷ്ടപ്പെട്ടത്. 71000 രൂപയാണ് അക്കൌണ്ടിൽനിന്ന് നഷ്ടമായത്. ഗൂഗിൾ പേ കസ്റ്റമർകെയർ നമ്പർ എന്ന നിലയിൽ യുവതി വിളിച്ചത് ഇന്‍റർനെറ്റിൽ സെർച്ച് ചെയ്തപ്പോൾ ലഭിച്ച ഹാക്കർമാരുടെ നമ്പരിലേക്കാണെന്നാണ് സംശയിക്കപ്പെടുന്നത്.

ഏതായാലും 71000 രൂപ നഷ്ടായതോടെ യുവതി സ്റ്റേറ്റ് ബാങ്കിന്റെ സാർതേബാരി ബ്രാഞ്ചിൽ പരാതി നൽകി. അതിനൊപ്പം സാർതേബാരി പോലീസ് സ്റ്റേഷനിലും പരാതി നൽകിയിട്ടുണ്ട്. പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.