പച്ചക്കറി ലോറിയിൽ ലഹരിക്കടത്ത്; തൃശൂരിലെ മൊത്ത വിതരണക്കാരനിൽ നിന്നും പിടികൂടിയത് ഒരു ലക്ഷം രൂപയുടെ 'ഹാൻസ്'

തൃശൂര്‍: പച്ചക്കറിയുടെ മറവില്‍ കേരളത്തിലെത്തിച്ച ലഹരി വസ്തു പൊലീസ് പിടികൂടി. വലപ്പാട് കോതകുളത്തെ വാടക വീട്ടില്‍ നിന്നും 51 ചാക്ക് ഹാന്‍സ് വലപ്പാട് പൊലീസാണ് പിടികൂടിയത്. പിടിച്ചെടുത്ത ഹാന്‍സിന് വിപണയില്‍ ഒരു ലക്ഷത്തോളം രൂപ വിലവരും.

സംഭവത്തില്‍ രണ്ട് പേരെ അറസ്റ്റ് ചെയ്തു. എടമുട്ടം വലിയകത്ത് വീട്ടില്‍ ദിലീപ് (49), തമിഴ്‌നാട് സ്വദേശി ശെല്‍വ മണി (29) എന്നിവരാണ് പിടിയിലായത്.

ഓരോ ചാക്കിലും 1,500 ഹാന്‍സ് പാക്കറ്റുകള്‍ വീതമുണ്ടായിരുന്നെന്ന് പൊലീസ് പറഞ്ഞു. കോയമ്പത്തൂരില്‍ നിന്നും പച്ചക്കറി കയറ്റിക്കൊണ്ടുവരുന്ന വാഹനങ്ങളില്‍ രഹസ്യമായാണ് ഹാന്‍സ് കൊണ്ടുവന്നത്.

ഹാന്‍സ് മൊത്തവിതരണം ചെയ്യുന്ന ശൃംഖലയിലെ പ്രധാന കണ്ണികളാണ് ഇവരെന്ന് പൊലീസ് പറഞ്ഞു. നിരവധി കേസുകളിലെ പ്രതികളാണ് ഇരുവരും. ഹാന്‍സ് മൊത്തവിതരണം ചെയ്യുന്ന ശൃംഖലയിലെ പ്രധാന കണ്ണികളാണ് ഇവരെന്ന് പൊലീസ് പറഞ്ഞു.

നിരവധി കേസുകളിലെ പ്രതികളാണ് ഇരുവരും. വലപ്പാട് പൊലീസ് ഇന്‍സ്‌പെക്ടര്‍ കെ. സുമേഷ്, എസ്.ഐ വി.പി അരിസ്റ്റോട്ടില്‍, എ.എസ്.ഐ ജയന്‍, സി.പി.ഒ മാരായ ഉണ്ണിക്കൃഷ്ണന്‍, രാഗേഷ്, സുമിത് എന്നിവരടങ്ങുന്ന സംഘമാണ് പ്രതികളെ പിടികൂടിയത്.