വീട്ടമ്മയുടെ ബലാത്സംഗം; വൈദികന് ഹൈക്കോടതിയുടെ മുൻകൂർ ജാമ്യം

കൊച്ചി: കോഴിക്കോട് ചേവായൂരിൽ വീട്ടമ്മയെ ബലാത്സംഗം ചെയ്ത കേസിൽ പ്രതിയായ വൈദികന് ഹൈക്കോടതി ഉപാധികളോടെ മുൻകൂർ ജാമ്യം അനുവദിച്ചു. പ്രതിയായ ഫാദർ മനോജ് പ്ലാക്കൂട്ടം പത്ത് ദിവസത്തിനകം അന്വേഷണ ഉദ്യോഗസ്ഥന് മുന്നിൽ ഹാജരായി ജാമ്യം എടുക്കണമെന്നാണ് ഹൈക്കോടതി ഉത്തരവിട്ടിരിക്കുന്നത്.

2017 ജൂണ്‍ 15 നാണ് കേസിനാസ്പദമായ സംഭവം നടക്കുന്നത്. വിദേശ മലയാളിയായ വീട്ടമ്മയെ ചേവായൂരിലെ വീട്ടിൽ വെച്ച് വൈദികൻ ബലാത്സംഗം ചെയ്‌തെന്നാണ് പരാതി. സഭയുടെയും താമരശ്ശേരി ബിഷപിന്റെയും സമ്മർദത്തെ തുടർന്ന് പരാതി നൽകാൻ വൈകിയതെന്നാണ് വീട്ടമ്മയുടെ മൊഴി.

വീട്ടമ്മയുടെ പരാതിയുമായി ബന്ധപ്പെട്ട് താമരശേരി രൂപത അധികൃതരിൽ നിന്ന് അന്വേഷണ സംഘം മൊഴിയെടുത്തിരുന്നു.

ചേവായൂർ ഇടവക വികാരിയായിരിക്കെ ഫാ. മനോജ് പ്ലാക്കൂട്ടം ബലാത്സംഗം ചെയ്തത് സെബന്ധിച്ച് താമരശേരി ബിഷപ്പ് മാർ റമജിയോസ് ഇഞ്ചനാനിയിലിന് നൽകി. എന്നാൽ ബിഷപ് പരാതി പൂഴ്ത്തിയെന്നും 45 കാരിയായ വീട്ടമ്മ നൽകിയ പരാതിയിൽ ആരോപിക്കുന്നു.

ഫാ. മനോജ് പ്ലാക്കൂട്ടത്തെ കണ്ടെത്താന്‍ അന്വേഷണ സംഘത്തിന് കഴിഞ്ഞിട്ടില്ല. ഇതിനിടെയാണ് ഫാ.മനോജ് പ്ളാക്കൂട്ടം ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചത്.

വീട്ടമ്മയുടെ പരാതിയെത്തുടർന്ന് ഇടവക വികാരി സ്ഥാനത്തു നിന്നും മറ്റ് ചുമതലകളിൽ നിന്നും മനോജ് പ്ലാക്കൂട്ടത്തെ രൂപത നീക്കിയിരുന്നു.

 തിരുവനന്തപുരത്ത് ഉപരി പഠനത്തിന് പോയ ഇയാൾ പൊലീസ് കേസ് എടുത്തതോടെ ഒളിവിൽ പോയതായാണ് വിവരം.