കൈക്കൂലിയായി ആവശ്യപ്പെട്ടത് 8000 രൂപ; നൽകിയത് 5000; ബാക്കി പണം വാങ്ങാനെത്തിയ ഹെൽത്ത് ഇൻസ്പെകടർ വിജിലൻസ് വലയിൽ

തൃശൂർ: സാനിറ്റേഷൻ സർട്ടിഫിക്കറ്റ് നൽകാൻ കടയുടമയിൽ നിന്നും കൈക്കൂലി വാങ്ങിയ ഹെൽത്ത് ഇൻസ്‌പെക്ടർ വിജിലൻസ് പിടിയിലായി. മാളയിലെ പൊയ്യ കുടുംബാരോഗ്യ കേന്ദ്രത്തിലെ ഹെൽത്ത് ഇൻസ്‌പെക്ടർ ഗ്രേഡ് 2 രതീഷ് കുമാറാണ് അറസ്റ്റിലായത്. പൊയ്യയിലെ ഫുഡ് കഫേ എന്ന സ്ഥാപനത്തിന്റെ ഉടമയിൽ നിന്നും കൈക്കൂലി വാങ്ങുന്നതിനിടെയാണ് ഉദ്യോഗസ്ഥൻ വിജിലൻസ് വിരിച്ച വലയിലായത്.

സർട്ടിഫിക്കറ്റ് നൽകുന്നതിന് ഹെൽത്ത് ഇൻസ്‌പെക്ടർ 8,000 രൂപയാണ് ആവശ്യപ്പെട്ടത്. എന്നാൽ കടയുടമ 5,000 രൂപ നൽകി. ബാക്കി പണം വേണമെന്ന് ആവശ്യപ്പെട്ട് കടയിലെത്തി.

കടയുടമ ഈ വിവരം തൃശൂർ വിജിലൻസ് ഡിവൈ.എസ്.പി യു. പ്രേമനെ അറിയിച്ചു. ഇതിനു പിന്നാലെയാണ് 2,000 രൂപ ഹെൽത്ത് താമസിക്കുന്ന സ്ഥലത്ത് വച്ചു കൈമാറുമ്പോഴാണ് വിജിലൻസ് സംഘം ഇൻസ്‌പെക്ടറെ കുടുക്കിയത്.

ഡിവൈ.എസ്. പിയുടെ നേതൃത്വത്തിൽ ഇൻസ്‌പെക്ടർമാരായ സി.ജി. ജിം പോൾ, പി.ആർ സരീഷ്, കെ. ടി സലിൽകുമാർ എന്നിവർ ചേർന്നാണ് രതീഷ് കുമാാറിനെ അറസ്റ്റ് ചെയ്തത്. കണ്ണൂർ സ്വദേശിയായ രതീഷ് കുമാറിനെതിരെ നേരത്തെയും പരാതി ഉയർന്നിരുന്നു.