ദേവഗൗഡയുടെ അടുത്ത ബന്ധുവിൽ നിന്ന് ആദായ നികുതി വകുപ്പ് ഉദ്യോഗസ്ഥര്‍ 10 കോടി രൂപ പിടിച്ചെടുത്തു

ബംഗളൂരു: കർണാടകയിലെ കോൺട്രാക്ടറുടെ വീട്ടിൽ ആദായ നികുതി വകുപ്പ് നടത്തിയ റെയ്ഡിൽ 10 കോടി രൂപ പിടിച്ചെടുത്തു. കാർ ഷോറൂം ഡീലറായ ഡി. ടി പരമേഷയുടെ ഉടമസ്ഥതയിലുള്ള ലോക്കറുകളിൽ നിന്നാണ് പണം കണ്ടെത്തിയത്.

കർണാടക മുൻ മുഖ്യമന്ത്രിയും ജെഡിഎസ് നേതാവുമായ എച്ച് ഡി ദേവഗൗഡയുടെ അടുത്ത ബന്ധുവാണ് ഇയാൾ. ബാങ്ക് ലോക്കറിൽ പണം സൂക്ഷിച്ചിരിക്കുന്നതിന്റെ ദൃശ്യങ്ങൾ ന്യൂസ് 18 കന്നഡക്ക് ലഭിച്ചു.

ഷിവമോഗയിലെ വീട്ടിലാണ് പരിശോധന നടത്തിയത്. കോൺട്രാക്ടർമാരിൽ നിന്ന് വലിയ തുകകൾ വാങ്ങി രാഷ്ട്രീയക്കാർക്ക് ഇയാൾ കൈമാറുന്നതായി ഇന്റലിജൻസ് റിപ്പോർട്ട് ചെയ്തിരുന്നു. ഇതിൻറെ അടിസ്ഥാനത്തിലാണ് ആദായ നികുതി വകുപ്പ് ഉദ്യോഗസ്ഥർ പരിശോധന നടത്തിയത്.

റെയ്ഡിനിടെ കാനറ ബാങ്കിലെയും കർണാടക ബാങ്കിലെയും രണ്ട് ലോക്കറുകൾ തുറക്കാൻ കഴിഞ്ഞില്ല. ഇതിൻറെ താക്കോൽ നഷ്ടപ്പെട്ടെന്നാണ് ഇയാൾ പറഞ്ഞത്. എന്നാൽ കഴിഞ്ഞ ദിവസം ഈ ലോക്കറുകൾ പൊളിക്കാൻ ഉദ്യേഗസ്ഥർ തീരുമാനിച്ചു. അപ്പോൾ താക്കോൾ പരമേശ് കൈമാറുകയായിരുന്നു. ആറ് കോടി രൂപയാണ് ലോക്കറുകളിൽ നിന്ന് കണ്ടെത്തിയത്. മൊത്തം പത്ത് കോടി രൂപയാണ് പിടിച്ചെടുത്തത്.