നവവധു ഭർതൃവീട്ടുകാരെ മയക്കിക്കിടത്തി ആഭരണങ്ങളും പണവുമായി മുങ്ങി; സംഭവം വിവാഹം കഴിഞ്ഞ് നാലാം ദിനം

ലക്നൗ: നവവധു ഭർതൃവീട്ടുകാരെ മയക്കിക്കിടത്തിയശേഷം ആഭരണങ്ങളും പണവുമായി മുങ്ങി. ഉത്തർപ്രദേശിലെ ബദാവൂൻ ജില്ലയിൽ ഇന്നലെയായിരുന്നു സംഭവം.

ദത്തഗഞ്ച് കോട്വാലി പൊലീസ് സ്റ്റേഷന് കീഴിൽ വരുന്ന ഛോടാപാറ ഗ്രാമത്തിലാണ് സംഭവം. വെള്ളിയാഴ്ച രാത്രിയാണം സംഭവം നടന്നതെന്ന് പൊലീസ് സൂപ്രണ്ട് ജിതേന്ദ്ര കുമാർ ശ്രീവാസ്തവ പറഞ്ഞു. ഭർതൃവീട്ടുകാർ ഇതു സംബന്ധിച്ച് പൊലീസിന് പരാതി നൽകി.

ഡിസംബർ ഒൻപതിനായിരുന്നു പ്രവീൺ- റിയ ദമ്പതികളുടെ വിവാഹം. അസംഗഢ് സ്വദേശിനിയാണ് റിയ. വെള്ളിയാഴ്ചത്തെ അത്താഴ ഭക്ഷണത്തിൽ ലഹരി കലർത്തിയതോടെയാണ് ഭർതൃവീട്ടുകാർ ഒന്നടങ്കം മയക്കത്തിലായി. ഈ തക്കം നോക്കി റിയ മുങ്ങുകയായിരുന്നു.

ഭർതൃവീട്ടിൽ നിന്ന് 70000 രൂപയും മൂന്നു ലക്ഷം രൂപ വിലവരുന്ന ആഭരണങ്ങളുമാണ് റിയ കടന്നുകളഞ്ഞത്. പരാതിയുടെ അടിസ്ഥാനത്തിൽ അന്വേഷണം ആരംഭിച്ചതായും പൊലീസ് അറിയിച്ചു.