കളിയിക്കാവിള കൊലപാതകം; പാറശാല സ്വദേശികള്‍ കസ്റ്റഡിയിൽ

തിരുവനന്തപുരം: കളിയിക്കാവിളയിൽ എ.എസ്.ഐ വിൽസണെ വെടിവെച്ച് കൊന്ന കേസുമായി ബന്ധപ്പെട്ട് പാറശാല സ്വദേശികളായ രണ്ടു പേരെ പൊലീസ് കസ്റ്റഡിയിലെടുത്തു. ഇവരെ ചോദ്യം ചെയ്ത് വരികയാണ്.

പാറശ്ശാല ഇഞ്ചിവിള സ്വദേശികളായ താസിം,സിദ്ധിക് എന്നിവരെയാണ് കേരള പോലീസ് ഇന്ന് കസ്റ്റഡിയിലെടുത്തത്. കൊലപാതകത്തിന് മുമ്പ് പ്രധാനപ്രതിയായ തൗഫീഖ് ഇവരുമായി നിരന്തരം ഫോണിൽ ബന്ധപ്പെട്ടിരുന്നതായാണ് വിവരം. പ്രതികൾക്ക് സൗകര്യമൊരുക്കിയത് ഇവരാണെന്നും അന്വേഷണസംഘം സംശയിക്കുന്നു.

കേരള- തമിഴ്നാട് - പൊലീസിലെ ഉന്നത ഉദ്യോഗസ്ഥരാണ് ഇവരെ ചോദ്യം ചെയ്യുന്നത്. നേരത്തെ തിരുവനന്തപുരം പൂന്തുറ സ്വദേശിയായ ഒരാളെയും പാലക്കാട് മേപ്പറമ്പ് സ്വദേശികളായ രണ്ടു പേരെയും തമിഴ് നാട് ക്യൂ ബ്രാഞ്ച് പിടികൂടിയിരുന്നു.

തമിഴ്നാട് ക്യൂബ്രാഞ്ചും, കേരള തീവ്രവാദ വിരുദ്ധ സ്വക്വാഡും അതിർത്തിയിൽ വീണ്ടും യോഗം ചേർന്ന് അന്വേഷണം ശക്തമാക്കി. അതേ സമയം എൻ.ഐ.എ തമിഴ്‌നാട്ടിലെത്തി അന്വേഷണം ആരംഭിച്ചതായാണ് വിവരം.

തിങ്കളാഴ്ച്ച രാത്രിയാണ് എ.എസ്ഐ വിത്സൻ വെടിയേറ്റ് മരിക്കുന്നത്. പ്രതികളുമായി ബന്ധമുള്ള ചിലരെ ക്യുബ്രാഞ്ച് രണ്ടാഴ്ച മുമ്പ് കസ്റ്റഡിയിൽ എടുത്തിരുന്നു. ഇതിൻറെ പ്രതികാരമാകാം കൊലപാതമെന്നാണ് നിഗമനം. മുഖ്യപ്രതികളായ തൗഫീക്കും ഷമീമും ഒളിവിലാണ്.