ആലപ്പുഴയിൽ ഭർതൃവീട് ആക്രമിച്ച് കർണാടക സ്വദേശിനിയെ തട്ടിക്കൊണ്ടുപോയി

ആലപ്പുഴ: ഭർതൃവീട് ആക്രമിച്ച് കർണാടക സ്വദേശിനിയെ തട്ടിക്കൊണ്ടുപോയി ഒരു സംഘം ആളുകൾ ചേർന്ന് തട്ടിക്കൊണ്ടുപോയി. യുവതിയുടെ ബന്ധുക്കളാണ് വീട് ആക്രമിച്ചു തട്ടിക്കൊണ്ടുപോയത്. ഹരിപ്പാട് കാർത്തികപ്പള്ളി പന്ത്രണ്ടാം വാർഡിൽ അഖിൽ ഭവനത്തിൽ അനിൽകുമാറിന്‍റെ മുകൻ അഖിൽ(22) വിവാഹം കഴിച്ച ന്യൂ ഹൊറൈസൺ കോളേജ്‌ വിദ്യാർഥിനി ബംഗളൂരു കസ്‌തൂരി നഗർ പി കൃഷ്‌ണയുടെ മകൾ വിദ്യശ്രീ (18)യെയാണ്‌ ബന്ധുക്കൾ തട്ടിക്കൊണ്ടുപോയത്.

പ്ലസ് ടു വിദ്യാർഥിനിയായ വിദ്യശ്രീയെ സമൂഹമാധ്യമത്തിലൂടെയാണ് അഖിൽ പരിചയപ്പെടുന്നത്. പിന്നീട് ഇരുവരും പ്രണയത്തിലാകുകയും പെൺകുട്ടി വീടുവിട്ട് അഖിലിനൊപ്പം ഇറങ്ങിവരുകയുമായിരുന്നു. പെൺകുട്ടി മാർച്ച്‌ 29ന്‌ അഖിലിനൊപ്പം മഹാദേവികാട്‌ എത്തി. 30ന്‌ നാട്ടിലെ ക്ഷേത്രത്തിൽ ഇരുവരും വിവാഹിതരായി.

വിവരമറിഞ്ഞ്‌ പെൺകുട്ടിയുടെ ബന്ധുക്കൾ തൃക്കുന്നപ്പുഴ പൊലീസിൽ പരാതി നൽകി. പൊലീസ് ഇരുകൂട്ടരെയും വിളിച്ചുവരുത്തിയശേഷം പെൺകുട്ടിയെ യുവാവിനൊപ്പം വിട്ടു. പെൺകുട്ടിയുടെ ബന്ധുക്കളും അഖിലിന്റെ വീട്ടിലെത്തിയശേഷമാണ്‌ മടങ്ങിയത്‌. ഇതിനുശേഷമാണ്‌ തട്ടിക്കൊണ്ടുപോകൽ.

പുലർച്ചെ അഖിലിന്‍റെ വീട്ടിലേക്ക് അതിക്രമിച്ചുകയറിയ യുവതിയുടെ ബന്ധുക്കൾ ബലംപ്രയോഗിച്ച് യുവതിയെ കടത്തിക്കൊണ്ടുപോകുകയായിരുന്നു. തടയാൻ ശ്രമിച്ച അഖിൽ, അച്ഛൻ അനിൽകുമാർ(45), അമ്മ ബിന്ദു (40), ബിന്ദുവിന്റെ അമ്മ കൊച്ചുകുഞ്ഞ്‌ (65) എന്നിവർക്ക് മർദ്ദനമേറ്റു. ഇവർ ഹരിപ്പാട് താലൂക്ക്‌ ആശുപത്രിയിൽ ചികിത്സതേടി.

തൃക്കുന്നപ്പുഴ പൊലീസ് ബംഗളൂരുവിലേക്ക് പുറപ്പെട്ടു. തൃക്കുന്നപ്പുഴ എസ്ഐ രതീഷ് ബാബു, സിപിഒമാരായ ശ്യാം, വിഷ്ണു, വൈശാഖ്, ആതിര എന്നിവരടങ്ങുന്ന സംഘമാണ്‌ ബംഗളുരുവിലേക്ക്‌ പോയത്‌.

കായംകുളം പുനലർ ചെങ്കോട്ടവഴി തമിഴ്നാട്ടിലൂടെയാണ് സംഘം ബംഗളൂരുവിലേക്ക് പോയതെന്ന്‌ തൃക്കുന്നപ്പുഴ പൊലീസ് പറഞ്ഞു. ശനി പുലർച്ചെ അഞ്ചരയോടെ മൂന്നു വാഹനങ്ങളിൽ മാരകായുധങ്ങളുമായെത്തിയവരാണ് ആക്രമണം നടത്തിയത്‌.

അടുക്കള വാതിൽ ചവിട്ടിത്തുറന്ന്‌ അകത്തുകയറിയ സംഘം പെൺകുട്ടിയെ ബലമായി പിടിച്ചിറക്കിക്കൊണ്ടുപോകുകയായിരുന്നു. തടയാൻശ്രമിച്ചവരെ ആക്രമിച്ച്‌ മാരകായുധംകാട്ടി വധഭീഷണി മുഴക്കി പെൺകുട്ടിയെ വാഹനത്തിൽ കയറ്റിക്കൊണ്ടുപോകുകയായിരുന്നു.