കടയുടമയെ ലോഡ്ജിൽ വിളിച്ചു വരുത്തി നഗ്ന ചിത്രങ്ങളെടുത്ത് ഹണി ട്രാപ്പ് തട്ടിപ്പ്; കോതമംഗലത്ത് യുവതിയുൾപ്പെടെ 5 പേർ പിടിയിൽ

കോതമംഗലം: കോതമംഗലത്ത് ഹണിട്രാപ്പ് തട്ടിപ്പുമായി ബന്ധപ്പെട്ട് യുവതി ഉൾപ്പെടെ അഞ്ച് പേർ പിടിയിൽ. ലോഡ്ജിൽ വിളിച്ചു വരുത്തി നഗ്ന ചിത്രങ്ങൾ എടുത്തു കടയുടമയെ ബ്ലാക്‌മെയിൽ ചെയ്ത് പണവും കാറും കൈവശപ്പെടുത്തുകയായിരുന്നു യുവതിയും കൂട്ടാളിയും ചെയ്തത്. സിനിമയെ പോലും വെല്ലുന്ന തരത്തിലുള്ള സാഹചര്യങ്ങൾ ഒരുക്കിയാണ് ഹണി ട്രാപ് തട്ടിപ്പ് നടത്തിയത്.

സംഭവത്തിൽ ഇഞ്ചതൊട്ടി സ്വദേശിനിയായ യുവതിയും കുറ്റിലഞ്ഞി, നെല്ലിക്കുഴി സ്വദേശികളായ 4 യുവാക്കളുമാണ് പിടിയിലായത്. മൂവാറ്റുപുഴ സ്വദേശിയായ കടയുടമയെ തട്ടിക്കൊണ്ടുപോയി ബ്ലാക്‌മെയിൽ ചെയ്ത് പണവും കാറും ഫോണും ആറംഗ സംഘം തട്ടിയെടുക്കുകയായിരുന്നു. ഈ സംഘത്തിലെ 5പേരാണ് ഇപ്പോൾ പിടിയിലായത്.

നെല്ലിക്കുഴി പഞ്ചായത്ത് ഓഫീസിനു സമീപം വാടകയ്ക്ക് താമസിക്കുന്ന കുട്ടമ്പുഴ ഇഞ്ചത്തൊട്ടി സ്വദേശി മുളയംകോട്ടിൽ ആര്യ (25),നെല്ലിക്കുഴി സ്വദേശികളായ കാപ്പു ചാൽ മുഹമ്മത് യാസിൻ (22), പറമ്പിൽ റിസ്വാൻ 21 ) കുറ്റിലഞ്ഞി സ്വദേശികളായകപ്പട കാട്ട് അശ്വിൻ (19), കാഞ്ഞിരകുഴി ആസിഫ് (19) എന്നിവരാണ് പൊലീസിൻ്റെ പിടിയിലായത്.

ആര്യ വ്യാപാരിയെ കോതമംഗലത്തെ ലോഡ്ജിൽ വിളിച്ചുവരുത്തുകയും ബ്ലാക്‌മെയിൽ ചെയ്യുകയുമായിരുന്നു. തുടർന്ന് പണവും കാറും തട്ടിയെടുക്കുകയും ചെയ്തു. ഇയാളുടെ മൂവാറ്റുപുഴയിലെ ഡി.ടി.പി. സെന്ററിൽ ആര്യ ജീവനക്കാരിയായിരുന്നു.

ലോക്‌ഡൗൺ കാലത്ത് ഇവിടത്തെ കടയിൽ തിരക്കില്ലാത്തതിനാൽ തൽക്കാലികമായി നിർത്തിയിരുന്നു. ആര്യക്ക് അങ്കമാലിയിൽ ഒരു സ്ഥാപനത്തിൽ ജോലി കിട്ടിയെന്നും അതിന്റെ ചെലവ് ചെയ്യാമെന്നും പറഞ്ഞ് കടയുടമയെ ലോഡ്ജിൽ വിളിച്ചുവരുത്തുകയായിരുന്നുവെന്നാണ് പൊലീസ് പറയുന്നത്.

വ്യാപാരി എത്തി കുറച്ച് കഴിഞ്ഞപ്പോൾ അഞ്ചംഗ സംഘം ലോഡ്ജിൽ എത്തി ഇരുവരുമൊരുമിച്ചുള്ള ചിത്രം പകർത്തി സോഷ്യൽ മീഡിയ വഴി പുറത്തുവിടുമെന്ന് ഭീഷണിപ്പെടുത്തി പണം ചോദിച്ചു. തുടർന്ന് കടയുടമയുടെ കൈവശം ഉണ്ടായിരുന്ന എ.ടി.എം. കാർഡും തട്ടിയെടുത്തു.

പിന്നീട് കടമയെയും കൂട്ടി കാറിൽ വിവിധ സ്ഥലങ്ങളിൽ കറങ്ങി നടന്നു. ഇതിനിടയിൽ കോട്ടപ്പടിയിൽ എത്തിയപ്പോൾ അശ്വിൻ സ്ഥലത്തെ കോളജിൽ എന്തോ ആവശ്യത്തിനു പോയ സമയത്ത് കടയുടമ മൂത്രമൊഴിക്കാനെന്നു പറഞ്ഞ് കാറിൽനിന്ന് പുറത്തിറങ്ങി.

അവിടത്തെ ഒരു സ്റ്റാഫിന്റെ കാൽക്കൽ വീണ് സംഭവം വിശദീകരിച്ചു. ഇതോടെ കടയുടമയെ മർദിച്ച്‌ കാറുമായി മറ്റുള്ളവർ കടന്നു. അശ്വിനെ പിന്നീട് കോട്ടപ്പടി പൊലീസ് പിടികൂടി കോതമംഗലം പൊലീസിന് കൈമാറി. നെല്ലിക്കുഴിയിൽ എത്തിയപ്പോൾ സംഘത്തിലൊരാൾക്കൊപ്പം സ്ഥലംവിടാൻ ശ്രമിക്കുന്നതിനിടെയാണ് ആര്യയെ കസ്റ്റഡിയിലെടുത്തത്.

സംഭവത്തിൽ മറ്റ് പ്രതികൾക്കായി അന്വേഷണം നടത്തി വരികയാണന്ന് പൊലീസ് പറഞ്ഞു. കോതമംഗലം സി ഐ അനിൽ ബി, എസ് ഐ ശ്യാംകുമാർ, എ എസ് ഐമാരായ നിജു ഭാസ്ക്കർ, രഘുനാഥ്, മുഹമ്മത്, സി പി ഒ മാരായ നിഷാന്ത്, പരീത്, ആസാദ്, അനൂപ് എന്നിവടരടങ്ങുന്ന സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻ്റ് ചെയ്തു.