കോട്ടയത്തെ വൈദികന്റെ ആത്‍മഹത്യ; സഭയുടെ പീഡനത്തെ തുടർന്നെന്ന് ഒരു വിഭാഗം വിശ്വാസികൾ

കോട്ടയം: കോട്ടയത്ത് വൈദികൻ പള്ളിമുറ്റത്തെ കിണറ്റിൽ വീണ് മരിച്ച സംഭവത്തിൽ സിറോ മലബാർ സഭയ്ക്കുള്ളിൽ പുതിയ വിവാദങ്ങൾക്ക് തുടക്കമായിരിക്കുകയാണ്.

സിറോ മലബാർ സഭക്ക് കീഴിലെ ചങ്ങനാശ്ശേരി അതിരൂപതയിലെ കോട്ടയം പുന്നത്തുറ( വെള്ളാപ്പള്ളി പള്ളി ) പള്ളിയിലെ വികാരി ജോർജ് എട്ടുപുരയിലിനെ ആണ് പള്ളിമുറ്റത്തെ കിണറ്റിൽ മരിച്ച നിലയിൽ കണ്ടെത്തിയത്.

മനോവിഷമത്തേത്തുടർന്നുളള ആത്മഹത്യയാണിതെന്നാണ് ഒരു വിഭാഗം ഇടവകാംഗങ്ങൾ കരുതുന്നത്.

" പുന്നത്തുറ പള്ളിയിൽ ഒരു വൈദികനും സ്ഥിരമായി പിടിച്ചുനിൽക്കാനാകാത്ത സാഹചര്യമായിരുന്നു. ചുരുങ്ങിയ കാലയളവിൽ തന്നെ വൈദികർ സ്ഥലം മാറ്റം വാങ്ങി പോകുമായിരുന്നു. ഇടവകാംഗങ്ങൾക്കിടയിലെ തർക്കമായിരുന്നു വൈദികർക്ക് പ്രതിസന്ധിയായത്.

എല്ലാവരോടും നല്ല രീതിയിൽ ആയിരുന്നു ജോർജ് അച്ചൻ പെരുമാറിയിരുന്നത്. രണ്ടുമാസം മുൻപ് സ്ഥലം മാറ്റ അപേക്ഷ നൽകിയിരുന്നെങ്കിലും സഭയിത് പരിഗണിക്കാത്തത് ആണ് മനോവിഷമത്തിനു കാരണം. സഭയുടെ ഈ അവഗണനയാണ് ആത്മഹത്യയ്ക്ക് കാരണം"സംഭവത്തെ കുറിച്ച് ഇടവകാംഗമായ ജോളി എട്ടു പുരയിൽ പറയുന്നു.

സഭയിലെ അൾത്താരയിൽ ഉണ്ടായിരുന്ന കുരിശു മാറ്റിവെച്ചത് ആണ് അനർഥങ്ങൾ ഉണ്ടാകാൻ കാരണം എന്നാണ് ഒരു വിഭാഗം വിശ്വാസികൾ പറയുന്നത്. എന്നാൽ ഇത് മുൻപുണ്ടായിരുന്ന അച്ചൻന്മാരാണ് ചെയ്തതെന്ന് മറുവിഭാഗം പറയുന്നു.

അതേസമയം സഭ പറയുന്നത് ഇങ്ങനെെയാണ്: പള്ളിയിലെ റബ്ബർ പുരയിൽ ഉണ്ടായ തീപിടുത്തത്തിൽ നാല് തൊഴിലാളികൾക്ക് പരിക്കേറ്റു. ഒരാൾ ഇപ്പോഴും അതീവ ഗുരുതരമായി തുടരുകയാണ്. ഇയാൾക്ക് വേണ്ടി വെള്ളിയാഴ്ച ഉപവാസ പ്രാർത്ഥന എടുക്കണം എന്ന് വൈദികൻ വിശ്വാസികളോട് അഭ്യർത്ഥിച്ചിരുന്നു. കുടുംബത്തെയും ആശ്വസിപ്പിച്ചിരുന്നു. ഈ മനോവിഷമം ആണ് ആത്മഹത്യയിലേക്ക് നയിച്ചതെന്ന് ചങ്ങനാശേരി അതിരൂപതാ ചൂണ്ടിക്കാട്ടി.

റബർ പുരയിലെ തീപിടുത്തത്തിൽ പള്ളിക്ക് വീഴ്ച വന്നതായി ആരോപണം ഉണ്ട്. പെരുന്നാളിന് കതിനയ്ക്ക് ഉപയോഗിച്ച ബാക്കി വെടിമരുന്ന് റബർ പുരയിലാണ് സൂക്ഷിച്ചത്. വെൽഡിങ് ജോലികൾ ചെയ്തപ്പോൾ തീപിടിച്ചതിന് കാരണം ഇതാണ്. ഇക്കാര്യത്തിൽ അന്വേഷണം വന്നാൽ വികാരിയ്ക്ക് എതിരെയടക്കം കേസ് വരും എന്നും സൂചനയുണ്ട്.

അതേസമയം വൈദികന്റെ മരണത്തിനു പിന്നിൽ ദുരൂഹത ഇല്ല എന്നാണ് പൊലീസ് നിലപാട്. കാര്യമായ മുറിവുകളൊന്നും ശരീരത്തിൽ ഇല്ല എന്ന് ഇൻക്വസ്റ്റ് നടത്തിയ കോട്ടയം ഡിവൈഎസ്പി ആർ ശ്രീകുമാർ വ്യക്തമാക്കി