നിയമവിദ്യാർഥിനിയെ തട്ടിക്കൊണ്ടുപോയി; തോക്കിൻമുനയിൽ 12 പേർ കൂട്ടബലാത്സംഗം ചെയ്തു

റാഞ്ചി: നിയമവിദ്യാർഥിനിയായ 25കാരിയെ തട്ടിക്കൊണ്ടുപോയി തോക്കിൻ മുനയിൽ 12 പേർ ചേർന്ന് കൂട്ടബലാത്സംഗം ചെയ്തു. റാഞ്ചിയിലെ അതീവ സുരക്ഷാ മേഖലയിലാണ് നാടിനെ നടുക്കിയ സംഭവം നടന്നത്. പെൺകുട്ടിയുടെ പരാതിയുടെ അടിസ്ഥാനത്തിൽ 12 പ്രതികളെയും പൊലീസ് അറസ്റ്റ് ചെയ്തു. ഇവർ കുറ്റം സമ്മതിച്ചതായും പൊലീസ് വ്യക്തമാക്കി.

കങ്കേ പൊലീസ് സ്റ്റേഷനിൽ രജിസ്റ്റർ ചെയ്ത എഫ്ഐആർ പ്രകാരം നവംബർ 26ന് വൈകിട്ട് 5.30നാണ് സംഭവം നടന്നത്. നഗരാതിർത്തിയിലെ സംഗ്രാപൂർ മേഖലയിൽ സുഹൃത്തിനൊപ്പമായിരുന്നു പെൺകുട്ടി. ഈ സമയം രണ്ട് ബൈക്കുകളിലായി എത്തിയ സംഘം പെൺകുട്ടിയെ തോക്കുചൂട്ടി തട്ടിക്കൊണ്ടുപോവുകയായിരുന്നുവെന്ന് പൊലീസ് പറയുന്നു.

ബൈക്കിൽ പെൺകുട്ടിയെ തട്ടിക്കൊണ്ടുപോകുന്നതിനിടെ പെട്രോൾ തീർന്നു വഴിയിലായി. പിന്നീട് സുഹൃത്തുക്കളെ വിളിച്ചുവരുത്തുകയായിരുന്നു. അവർ കൊണ്ടുവന്ന കാറിൽ പെണ്‍കുട്ടിയെ കയറ്റി അടുത്തുള്ള ഇഷ്ടിക ചൂളയിൽ കൊണ്ടപോയി കൂട്ട ബലാത്സംഗത്തിന് വിധേയയാക്കുകയായിരുന്നു.

സംഭവം നടന്നത് ലോ കോളജ് ക്യാമ്പസിൽ നിന്നും നാലുകിലോ മീറ്ററും മുഖ്യമന്ത്രിയുടെ ഓദ്യോഗിക വസതിയിൽ നിന്നും പത്ത് കിലോമീറ്ററും അകലെയുള്ള അതീവ സുരക്ഷാമേഖലയിലാണ് കുറ്റകൃത്യം നടന്നത്. ഡിജിപി, ഝാർഖണ്ഡ് ഹൈക്കോടതി ജഡ്ജി, പ്രതിപക്ഷ നേതാവ് എന്നിവരുടെ വസതികൾ ഉൾപ്പെടുന്ന പ്രദേശമാണിതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.

പീഡനത്തിനിരയായ പെണ്ഡകുട്ടി പിറ്റേദിവസം പൊലീസ് സ്റ്റേഷനിലെത്തി പരാതി നൽകി. തുടർന്ന് പൊലീസ് റെയ്ഡ് നടത്തി 12 പേരെയുംപിടികൂടി. പട്ടികജാതി- പട്ടികവർഗം അതിക്രമം തടയൽ നിയമം അടക്കമുള്ളവ ചുമത്തി കേസെടുത്തു. പ്രതികളിൽ നിന്ന് കാറും ബൈക്കും തോക്കും എട്ട് മൊബൈൽ ഫോണും കണ്ടെത്തി.