LockDownനിയന്ത്രണങ്ങൾ ലംഘിച്ചയാളെ അറസ്റ്റ് ചെയ്തു; പ്രദേശവാസികൾ പൊലീസിനെ ആക്രമിച്ചു

ഇന്‍ഡോർ: ലോക്ക്ഡൗൺ നിയന്ത്രണങ്ങൾ ലംഘിച്ചയാളെ പൊലീസ് അറസ്റ്റ് ചെയ്തതിന് പൊലീസിനെ നാട്ടുകാർ ആക്രമിച്ചു. മധ്യപ്രദേശിലെ ഇൻഡോറിലാണ് സംഭവം.

പ്രദേശവാസികൾ പൊലീസ് ഉദ്യോഗസ്ഥരെ പിന്തുടർന്ന് കല്ലെറിയുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. പ്രതികൾക്കായി പൊലീസ് അന്വേഷണം ആരംഭിച്ചു.

കോവിഡ് 19 കണ്ടെയ്ൻ മെന്റ് സോണായ റാവ്ജി ബസാർ ഏരിയയുടെ പരിധിയിൽ വരുന്ന പ്രദേശത്താണ് സംഭവം ഉണ്ടായത്. തിങ്കളാഴ്ച 50 ഓളം നാട്ടുകാർ ഒരു പ്രാദേശിക ശ്മശാനത്തിൽ തടിച്ചുകൂടിയതായി വിവരം ലഭിച്ചതിനെത്തുടർന്നാണ് പൊലീസ് സ്ഥലത്തെത്തിയത്.

ലോക്ക്ഡൗൺ ചട്ടങ്ങൾ ലംഘിച്ചതുമായി ബന്ധപ്പെട്ട് ഒരാളെ അറസ്റ്റ് ചെയ്യുകയും ചെയ്തു. ഇന്ത്യൻ ശിക്ഷാ നിയമത്തിലെ 188ാം വകുപ്പ് പ്രകാരം ഇയാൾക്കെതിരെ കേസ് രജിസ്റ്റർ ചെയ്തു.

ക്ഷുഭിതരായ നാട്ടുകാർ പൊലീസിനെതിരെ പ്രതിഷേധവുമായി രംഗത്തെത്തി. പൊലീസിനെതിരെ മുദ്രാവാക്യം വിളിച്ച് പൊലീസ് സ്റ്റേഷന്റെ വെളിയിൽ നാട്ടുകാർ പ്രതിഷേധിച്ചു.

പിരിഞ്ഞുപോകാൻ ആവശ്യപ്പെട്ടിട്ടും അനുസരിക്കാതിരുന്നതിനെ തുടർന്ന് പൊലീസ് ബലം പ്രയോഗിച്ചു. ഇതിനിടെയാണ് പൊലീസിനി നേരെ കല്ലേറുണ്ടായത്.

കൊറോണ വളരെയധികം ബാധിച്ച പ്രദേശങ്ങളിലൊന്നാണ് ഇൻഡോർ. ഇതുവരെ 2637 കോവിഡ് കേസുകളാണ് ഇവിടെ റിപ്പോർട്ട് ചെയ്തത്. 103 പേർ മരിക്കുകയും ചെയ്തു.

സമാനമായ മറ്റൊരു സംഭവം നേരത്തെ റിപ്പോർട്ട് ചെയ്തിട്ടുണ്ട്. പതിവ് സ്ക്രീനിംഗിനെത്തിയ മെഡിക്കൽ സ്റ്റാഫിനൊപ്പം പൊലീസ് ഉദ്യോഗസ്ഥരെയും നാട്ടുകാർ ആക്രമിക്കുകയായിരുന്നു.