പൊതുസ്ഥലത്ത് മൂത്രമൊഴിക്കുന്നത് ചോദ്യം ചെയ്തയാളെ മർദ്ദിച്ചുകൊന്നു; നാലുപേർ അറസ്റ്റിൽ

മുംബൈ: പൊതുസ്ഥലത്ത് മൂത്രമൊഴിക്കുന്നത് ചോദ്യം ചെയ്തയാളെ മർദ്ദിച്ചുകൊന്നു. നവി മുംബൈയിലാണ് സംഭവം. സച്ചിൻ പാട്ടീൽ(35) എന്നയാളാണ് ദാരുണമായി കൊല്ലപ്പെട്ടത്. റോഡിൽ ഗുരുതരാവസ്ഥയിൽ കണ്ടെത്തിയ സച്ചിനെ ആശുപത്രിയിൽ എത്തിച്ചപ്പോഴേക്കും മരണം സംഭവിച്ചിരുന്നു. സംഭവവുമായി ബന്ധപ്പെട്ട് നാലുപേരെ റബാലെ എം‌ഐ‌ഡി‌സി പോലീസ് അറസ്റ്റുചെയ്തു.

ഇന്നു രാവിലെയാണ് സംഭവം നടന്നത്. തിരക്കേറിയ ജങ്ഷന് സമീപം മൂത്രമൊഴിക്കാൻ ശ്രമിച്ച നാലംഗ സംഘത്തിനെതിരെ സച്ചിൻ പട്ടേൽ രംഗത്തെത്തി. തുടർന്ന് വാക്കുതർക്കമായി. ഒടുവിൽ നാലുപേരും ചേർന്ന് സച്ചിനെ മർദ്ദിക്കാൻ തുടങ്ങി. മർദ്ദനമേറ്റു അവശനിലയിലായ സച്ചിൻ കുഴഞ്ഞുവീണു. ഇതോടെ നാലുപേരും അവിടെനിന്ന് കടന്നുകളഞ്ഞു.

വഴിയാത്രക്കാരാണ് സച്ചിൻ പാട്ടീലിനെ സമീപത്തെ ആശുപത്രിയിലെത്തിച്ചത്. എന്നാൽ അപ്പോഴേക്കും മരണം സംഭവിച്ചിരുന്നതായി ഡോക്ടർമാർ അറിയിച്ചു. തലയ്ക്കേറ്റ ഗുരുതര പരിക്കാണ് മരണ കാരണമായത്. സച്ചിൻ പാട്ടീലിന്‍റെ മൃതദേഹം മോർച്ചറിയിലേക്കു മാറ്റി. പോസ്റ്റുമോർട്ടത്തിനുശേഷം ബന്ധുക്കൾക്കു വിട്ടുനൽകും.

സച്ചിനെ മർദ്ദിച്ച ആകാശ് ഗെയ്ക്ക് വാദ് എന്നയാളെയാണ് പൊലീസ് ആദ്യം അറസ്റ്റുചെയ്തത്. ഇയാളെ ചോദ്യം ചെയ്തതിൽനിന്നാണ് ഒപ്പമുണ്ടായിരുന്ന മൂന്നുപേരെ കൂടി പൊലീസ് കസ്റ്റഡിയിലെടുത്തത്. ചോദ്യം ചെയ്യലിൽ ഇവർ കുറ്റം സമ്മതിച്ചിട്ടുണ്ട്. പ്രതികൾക്കെതിരെ കൊലക്കുറ്റം ചുമത്തി. മജിസ്ട്രേറ്റിന് മുന്നിൽ ഹാജരാക്കിയ ഇവരെ ജനുവരി അഞ്ചു വരെ പോലീസ് കസ്റ്റഡിയിൽ വിട്ടിട്ടുണ്ട്.