'കടം വാങ്ങിയവരിൽ നിന്ന് രക്ഷപ്പെടാനും കാമുകിക്കൊപ്പം ജീവിക്കാനും തട്ടിക്കൊണ്ട് പോകൽ നാടകം' ; യുവാവ് അറസ്റ്റിൽ

ഭീവണ്ടി: പണം കടംവാങ്ങിയവരിൽ നിന്ന് രക്ഷപ്പെടുന്നതിനും കാമുകിക്കൊപ്പം ജീവിക്കുന്നതിനും തട്ടിക്കൊണ്ട് പോകൽ നാടകം നടത്തിയ യുവാവ് അറസ്റ്റിൽ.

ഉത്തർ പ്രദേശ് സ്വദേശിയായ സുലേമാൻ അൽവി എന്നയാളാണ് രാജസ്ഥാനിലെ ഭീവണ്ടിയിൽ നിന്ന് അറസ്റ്റിലായത്. വ്യാഴാഴ്ചയാണ് ഇയാളെ അറസ്റ്റ് ചെയ്തത്.

സഹോദരൻ സദ്ദാം ഹുസൈൻ, സുഹൃത്ത്, ഡ്രൈവർ എന്നിവർക്കൊപ്പം ചേർന്നാണ് സുലേമാൻ അലവി സ്വന്തം തട്ടിക്കൊണ്ട് പോകൽ നാടകം ആസൂത്രണം ചെയ്തത്.

സംഭവത്തെ കുറിച്ച് പൊലീസ് പറയുന്നത് ഇങ്ങനെയാണ്; സുലേമാനെ തട്ടിക്കൊണ്ട് പോയെന്ന് കാട്ടി സഹോദരൻ സദ്ദാം ഹുസൈൻ സെപ്തംബർ 21നാണ് മെയിൻപൂരിലെ ദൻഹർ പൊലീസ് സ്റ്റേഷനിൽ പരാതി നൽകിയത്.

ബൊലേറോയിൽ വീട്ടിലേക്ക് മടങ്ങി വരുന്നതിനിടെ സുലേമാനെ നാലംഗ അഞ്ജാത സംഘം തട്ടിക്കൊണ്ട് പോയെന്നായിരുന്നു പരാതി. ഐപിസി 364 വകുപ്പ് പ്രകാരം പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

അന്വേഷണത്തിൽ സദ്ദാം പറഞ്ഞ കാര്യങ്ങളും വസ്തുതകളും തമ്മിൽ യോജിച്ചിരുന്നില്ല. ഇതോടെ സഹോദരനെ കുറിച്ച് സദ്ദാമിന് അറിയാമെന്നും നൽകിയിരിക്കുന്നത് വ്യാജ പരാതിയാണെന്നും പൊലീസിന് വ്യക്തമായി.

ഇതിനിടെ സുലേമാനെ ഭീവണ്ടിയിൽ കണ്ടതായി വിവരം ലഭിച്ചു. ഒരു സംഘം ഉദ്യോഗസ്ഥർ ഭീവണ്ടിയിലേക്ക് പോയി. ഇവിടെ യുവതിക്കും രണ്ട് കുഞ്ഞുങ്ങൾക്കുമൊപ്പം സുലേമാൻ ജീവിക്കുന്നതായി കണ്ടെത്തി. ഇവിടെ നിന്നാണ് സുലേമാനെ അറസ്റ്റ് ചെയ്തത്.

വിവാഹിതനായ സുലേമാൻ  മറ്റൊരു യുവതിയുമായി എട്ടു വർഷത്തോളമായ് പ്രണയത്തിലായിരുന്നു. ഇവർക്കൊപ്പം ജീവിക്കുന്നതിനും കൂടാതെ 12 ലക്ഷം രൂപയുടെ കടം വീട്ടാൻ പണം ഇല്ലാതിരുന്നതിനെ തുടർന്നുമാണ് ഇത്തരത്തിലൊരു തട്ടിക്കൊണ്ട് പോകൽ നടകം നടത്തിയതെന്ന് പൊലീസ് പറഞ്ഞു.

കൂടാതെ നേപ്പാളിലേക്ക് കടക്കുന്നതിന് വേണ്ടിയുള്ള തയ്യാറെടുപ്പുകൾക്കിടെയാണ് ഇയാൾ അറസ്റ്റിലായത്. ആസൂത്രണത്തിൽ പങ്കെടുത്ത സഹോദരൻ സദ്ദാം, സുഹൃത്ത്, ഡ്രൈവർ എന്നിവരെയും പൊലീസ് അറസ്റ്റ് ചെയ്തു. കേസ് തെളിയിച്ച പൊലീസ് സംഘത്തിന് ഐജി എ സതീഷ് ഗണേഷ് 40,000 രൂപ സമ്മാനമായി നൽകി.