കാലിത്തൊഴുത്തിൽ ഒളിപ്പിച്ചിരുന്നത് 24 ലിറ്റർ വിദേശമദ്യം; മധ്യവയസ്കൻ പിടിയിൽ

ഇടുക്കി കട്ടപ്പനയിൽ വിദേശ മദ്യവുമായി മധ്യവയസ്കൻ പിടിയിലായി. ലബ്ബക്കട വടക്കേടത്ത് റെജിമോൻ ജോൺ ആണ് എക്‌സൈസ് സംഘത്തിന്റ പിടിയിലായത്. ഇയാളുടെ പുരയിടത്തിലെ കന്നുകാലിത്തൊഴുത്തിൽ നിന്നും 24 ലിറ്റർ വിദേശ മദ്യവും സംഘം കണ്ടെടുത്തു.

ഇടുക്കി എക്‌സൈസ് ഇന്റലിജൻസ് വിഭാഗത്തിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ കട്ടപ്പന എക്‌സൈസ് റേഞ്ച് ഉദ്യോഗസ്ഥർ നടത്തിയ മിന്നൽ പരിശോധനയിലാണ് ലബ്ബക്കടക്ക് സമീപം കാവടിക്കവലയിൽ നിന്നും 24 ലിറ്റർ വിദേശ മദ്യം പിടികൂടിയത്. രേഖകൾ ഇല്ലാതെ അളവിൽ കൂടുതൽ മദ്യം സൂക്ഷിച്ചതിന് വടക്കേടത്ത് റെജിമോൻ ജോണിനെ ജാമ്യമില്ലാ വകുപ്പുകൾ പ്രകാരം അറസ്റ്റ് ചെയ്തു.

ഇന്നലെ രാവിലെയാണ് എക്‌സൈസ് ഇന്റലിജൻസ് വിഭാഗത്തിന് ലബ്ബക്കടയിൽ അനധികൃത വിദേശ മദ്യവിൽപ്പന നടക്കുന്നുണ്ടെന്ന രഹസ്യ വിവരം ലഭിച്ചത്. പിന്നീട് നടന്ന റെയ്ഡിൽ റെജിമോന്റെ പുരയിടത്തിലുള്ള കന്നുകാലി തൊഴുത്തിൽ ചാക്കിട്ട് മൂടി ഒളിപ്പിച്ച നിലയിൽ 24 ലിറ്റർ വിദേശ മദ്യം കണ്ടെടുത്തു.

അരലിറ്റർ വീതമുള്ള 48 കുപ്പികളിലായാണ് മദ്യം സൂക്ഷിച്ചിരുന്നത്. പിടിയിലായ റെജിമോൻ ജോണിനെ കോടതിയിൽ ഹാജരാക്കി.

ഓണത്തോടനുബന്ധിച്ച് അമിത മദ്യഉപയോഗം തടയുന്നതിനായി ഓണം സ്പെഷ്യൽ ഡ്രൈവ് എന്ന പേരിൽ എക്സൈസ് വകുപ്പ് പ്രത്യേക പരിശോധന നടത്തിവരികയാണ്. ഇതേ തുടർന്ന് നിരവധി കേസുകളാണ് ഇടുക്കിയിൽ എക്സൈസ് സംഘം രജിസ്റ്റർ ചെയ്തിട്ടുള്ളത്.