ഭാര്യയുമായി അവിഹിത ബന്ധം; അയൽക്കാരനെ യുവാവ് കൊലപ്പെടുത്തി

ഭോപ്പാൽ: ഭാര്യയുമായി അവിഹിത ബന്ധമുണ്ടെന്ന് ആരോപിച്ച്, അയൽക്കാരനെ യുവാവ് കൊലപ്പെടുത്തി. മധ്യപ്രദേശിലെ സത്‌ന ജില്ലയിലെ രാം നഗർ പോലീസ് സ്റ്റേഷന് കീഴിലുള്ള ബാംനാഡി ഗ്രാമത്തിലാണ് സംഭവം. 45 കാരനായ മഹേഷ് പട്ടേലിനെ കൊലപ്പെടുത്തിയ കേസിൽ സജ്ജു കോൾ എന്ന യുവാവിനെ പൊലീസ് അറസ്റ്റ് ചെയ്തു. തന്‍റെ ഭാര്യയുയമായി അയൽക്കാരൻ ലൈംഗിക ബന്ധം പുലർത്തിയതോടെയാണ് കൊലപാതകം നടത്തിയതെന്ന് പ്രതി പൊലീസിനോട് സമ്മതിച്ചു.

ചൊവ്വാഴ്ച രാത്രിയാണ് സംഭവം. ഭാര്യയുമായുള്ള ബന്ധം ചോദ്യം ചെയ്തതോടെ ഇരുവരും തമ്മിൽ തർക്കമായി. തർക്കത്തിനൊടുവിൽ അയൽവാസിയെ പ്രതി ക്രൂരമായി മർദ്ദിച്ചു. അതിനുശേഷം സമീപത്തിരുന്ന കോടാലിയെടുത്ത് വെട്ടിക്കൊല്ലുകയായിരുന്നു. വെട്ടേറ്റ മഹേഷ് തൽക്ഷണം മരിച്ചു. നാട്ടുകാർ നോക്കിനിൽക്കവെയായിരുന്നു കൊലപാതകം. പോലീസ് സൂപ്രണ്ട് സത്‌ന ധർമീർ സിംഗ് ഉൾപ്പെടെയുള്ള മുതിർന്ന ഉദ്യോഗസ്ഥരുടെ നേതൃത്വത്തിലാണ് പ്രതിയെ അറസ്റ്റു ചെയ്തത്.

കൊല്ലപ്പെട്ട മഹേഷ് പട്ടേലിനോട് തന്റെ വീട്ടിൽ വരരുതെന്ന് സജ്ജു കോൾ ആവശ്യപ്പെട്ടിരുന്നു. എന്നാൽ അത് അവഗണിച്ചും മഹേഷ്, സജ്ജുവിന്‍റെ വീട്ടിലെത്തി. ഇതോടെയാണ് ഇരുവരും തമ്മിൽ വഴക്കായതെന്ന് റാം നഗർ പോലീസ് സബ് ഡിവിഷണൽ ഓഫീസർ ഹിമാലി സോണി ടൈംസ് ഓഫ് ഇന്ത്യയോട് പറഞ്ഞു.

മുമ്പ് ഡൽഹിയിൽ നടന്ന മറ്റൊരു സംഭവത്തിൽ 24 കാരനായ യുവാവ് തന്റെ സുഹൃത്തിനെ കൊലപ്പെടുത്തിയത് വലിയ വിവാദമായിരുന്നു. ലോക്ക്ഡൌൺ സമയത്ത് വായ്പ വാങ്ങിയ 77,000 രൂപ തിരികെ നൽകിയില്ലെന്ന് ആരോപിച്ചാണ് കൊലപാതകം നടത്തിയതെന്ന് പ്രതി പൊലീസിനോട് സമ്മതിച്ചിരുന്നു.