യു.പി ബാർ കൗൺസിൽ അധ്യക്ഷയെ കൊലപ്പെടുത്തിയ ആളും മരിച്ചു; അഭിഭാഷകൻ മരിച്ചത് ചികിത്സയിലിരിക്കെ

ഗുർഗ്രാം: യു.പി ബാർ കൗൺസിൽ അധ്യക്ഷയെ വെടിവെച്ച് കൊന്നതെന്ന് ആരോപണം നേരിട്ട അഭിഭാഷകൻ ചികിത്സയിലിരിക്കെ മരിച്ചു. മനിഷ് ശർമ്മ എന്നയാളാണ് ഗുർഗ്രാം ആശുപത്രിയിൽവെച്ച് മരിച്ചത്. ആഗ്ര കോടതി പരിസരത്തുവെച്ചാണ് യു.പി ബാർ കൗൺസിൽ അധ്യക്ഷ ദർവേഷ് യാദവ് വെടിയേറ്റ് മരിച്ചത്. മനീഷ് ശർമയാണ് ദർവേഷിനെതിരെ വെടിയുതിർത്തതെന്ന് ദൃക്സാക്ഷികൾ പറഞ്ഞിരുന്നു.

ദർവേഷിനെതിരെ മൂന്നു റൌണ്ട് വെടിയുതിർത്ത മനിഷ് ശർമ്മ അതിനുശേഷം സ്വയം വെടിവെക്കുകയായിരുന്നു. ഗുരുതരമായി പരിക്കേറ്റ മനിഷിനെ ഗുർഗ്രാമിലെ ആശുപത്രിയിൽ പ്രവേശിപ്പിച്ചു.

ഇക്കഴിഞ്ഞ ജൂൺ ഒമ്പതിനാണ് ദർവേഷ് യാദവ് യു.പി ബാർ കൗൺസിൽ അധ്യക്ഷയായി തെരഞ്ഞെടുക്കപ്പെട്ടത്. യു.പി ബാർ കൗൺസിലിലെ ആദ്യ വനിതാ പ്രസിഡന്‍റായിരുന്നു അവർ.

ദർവേഷ് കൊല്ലപ്പെട്ടതിന് പിന്നാലെ വനിതാ അഭിഭാഷകരുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് സുപ്രീം കോടതിയിൽ പൊതുതാൽപര്യ ഹർജി വന്നിരുന്നു. ഹർജി ജൂൺ 25ന് കേൾക്കാമെന്ന് സുപ്രീം കോടതി വ്യക്തമാക്കിയിട്ടുണ്ട്.

ഇക്കഴിഞ്ഞ മാർച്ചിലും ഉത്തർപ്രദേശിൽ ഒരു അഭിഭാഷകൻ കോടതി വളപ്പിൽവെച്ച് വെടിയേറ്റ് കൊല്ലപ്പെട്ടിരുന്നു.