മക്കളെ നായകൻമാരാക്കി അച്ഛൻ നിർമ്മിക്കുന്ന സിനിമയുടെ ഷൂട്ടിംഗ് മുടങ്ങി; പണം കണ്ടെത്താൻ ആട് മോഷണത്തിനിറങ്ങിയ സഹോദരങ്ങൾ അറസ്റ്റിൽ

ചെന്നൈ: മക്കളെ നായകൻമാരാക്കി അച്ഛൻ നിർമ്മിക്കുന്ന സിനിമയ്ക്ക് പണം കണ്ടെത്താൻ ആടുകളെ മോഷ്ടിച്ച സഹോദരൻമാർ അറസ്റ്റിൽ. തമിഴ്നാട്ടിലാണ് കോമഡി സിനിമയെ വെല്ലുന്ന സംഭവം യഥാർഥ ജീവിതത്തിൽ നടന്നത്. മൂന്നു വർഷമായി ആടുമോഷണം പതിവാക്കിയ ന്യൂ വാഷർമെൻപേട്ടിലെ സഹോദരങ്ങളായ വി നിരഞ്ജൻ കുമാർ (30), ലെനിൻ കുമാർ (32) എന്നിവരാണ് അറസ്റ്റിലായത്. ഇവരെ മാധവരം പോലീസ് ശനിയാഴ്ച അറസ്റ്റ് ചെയ്തതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.

ആടു മോഷണത്തിലൂടെ ദിവസേന എണ്ണായിരം രൂപവരെയാണ് ഇരുവരും സമാഹരിച്ചിരുന്നത്. ഇതിനായി ദിവസേന എട്ടു മുതൽ പത്ത് ആടുകളെ വരെ മോഷ്ടിക്കും. ചെങ്ങൽപേട്ട്, മാധവരം, മിഞ്ചൂർ, പൊന്നേരി എന്നീ വിജനമായ ഗ്രാമ പ്രദേശങ്ങൾ കേന്ദ്രീകരിച്ചായിരുന്നു മോഷണം.

വിജനമായ പാടങ്ങളിൽ മേയുന്ന ആടുകളെ കടത്തിക്കൊണ്ടു പോകുന്നതാണ് ഇവരുടെ പതിവ് രീതി. സംശയം തോന്നാതിക്കാൻ ഒരു പ്രദേശത്ത് നിന്നും ഒന്നോ രണ്ടോ ആടുകളെ മാത്രമെ ഒരു ദിവസം മോഷ്ടിക്കൂ. ഒക്ടോബർ 9 ന് മാധവരാമിലെ പളനിയിൽ നിന്ന് ആറ് ആടുകളിൽ ഒന്നിനെ കാണാനില്ലെന്ന പരാതി പൊലീസിന് ലഭിച്ചു.

തുടർന്ന് പ്രദേശത്തെ സിസിടിവി ദൃശ്യങ്ങൾ പരിശോധിച്ച് നടത്തിയ അന്വേഷണത്തിലാണ് സഹോദരന്മാർ വലയിലായത്. സി.സി ടിവി ദൃശ്യങ്ങളിൽ ഒരു കാർ കണ്ടെത്തിയെങ്കിലും രജിസ്ട്രേഷൻ നമ്പർ വ്യക്തമായിരുന്നില്ല. തുടർന്നാണ് പ്രദേശത്ത് ദിവസേന ഒരു ആടിനെയെങ്കിലും കാണാതാകുന്നത് പതിവാണെന്ന വിവരം ലഭിച്ചത്.

ഇതേത്തുടർന്ന് നിരീക്ഷണം ഏർപ്പെടുത്താൻ പൊലീസ് തീരുമാനിച്ചു. ഇതിന്റെ ഭാഗമായി സിവിൽ വേഷത്തിൽ പൊലീസുകാരെ വിന്യസിച്ചു.

എന്നാൽ ഇതൊന്നും അറിയാതെ പതിവ് മോഷണത്തിനിറങ്ങിയ സഹാദരൻമാർ പൊലീസിന്റെ വലിയിൽ വീഴുകയായിരുന്നു.

ഇരുവരുടെയും പിതാവ് വിജയ് ശങ്കർ തന്റെ മക്കളെ നായകൻമാരാക്കി ‘നീ താൻ രാജ’ എന്ന പേരിൽ ഒരു സിനിമയുടെ ചിത്രീകരണം ആരംഭിച്ചിരുന്നതായിപൊലീസ് പറയുന്നു. സാമ്പത്തിക പ്രതിസന്ധിയെത്തുടർന്ന് ചിത്രത്തിന്റെ ഷൂട്ടിംഗ് മുടങ്ങിയതോടെയാണ് അച്ഛനെ സഹായിക്കാനായി മക്കൾ മോഷണത്തിനിറങ്ങിയത്.

ഒന്നോ രണ്ടോ ആടുകളെ നഷ്ടപ്പെട്ടാൽ ആരും പരാതി നൽകില്ലെന്ന പ്രതീക്ഷയാണ് മോഷണം തുടരാൻ പ്രേരിപ്പിച്ചതെന്നും ഇരുവരും പൊലീസിനോട് പറഞ്ഞു. ഏതായാലും മോഷണക്കുറ്റത്തിന് അറസ്റ്റിലായ സിനിമാ നടൻമാർ ഇപ്പോൾ ജുഡീഷ്യൽ കസ്റ്റഡിയിലാണ്.