ശാരീരികബന്ധത്തിന് വഴങ്ങാതിരുന്നതിന് കുത്തേറ്റു; യുവതിയ്ക്ക് സംസാരശേഷി നഷ്ടമായി

നോയിഡ: ശാരീരികബന്ധത്തിന് വിസമ്മതിച്ചതിനെ തുടർന്ന് ഓട്ടോറിക്ഷ ഡ്രൈവർ 20കാരിയെ കുത്തി പരിക്കേൽപ്പിച്ചു. ഉത്തർപ്രദേശിലെ നോയിഡയിലാണ് സംഭവം. ഒരു സ്വകാര്യ കമ്പനിയിലെ ജീവനക്കാരിയായ യുവതിയെ ജോലി സ്ഥലത്തു വിടുന്നതിനായി പോകുമ്പോഴായിരുന്നു ആക്രമണമുണ്ടായത്. സംഭവത്തിൽ പ്രതിയായ ആസാംഗഡ് സ്വദേശിയാണ് ശിവ്‌നാഥ് എന്നയാളെ പൊലീസ് അറസ്റ്റുചെയ്തു.

35കാരനായ ഓട്ടോഡ്രൈവർ യുവതിയോട് ലൈംഗികച്ചുവയോടെ സംസാരിക്കുകയും ശാരീരികബന്ധത്തിന് നിർബന്ധിക്കുകയും ചെയ്തു. എന്നാൽ ഇതിന് വിസമ്മതിച്ചതോടെ കൈയിൽ കരുതിയിരുന്ന കത്തിയെടുത്ത് യുവതിയുടെ കഴുത്തിൽ കുത്തുകയായിരുന്നു. അതിനുശേഷം ഓട്ടോഡ്രൈവർ സംഭവസ്ഥലത്തുനിന്ന് കടന്നു കളയുകയും ചെയ്തു.

യുവതി കുത്തേറ്റു കിടക്കുന്നതുകണ്ട വഴിയാത്രക്കാരിയാണ് വിവരം പൊലീസിൽ അറിയിച്ചത്. തുടർന്ന് നാട്ടുകാരും പൊലീസും ചേർന്ന് യുവതിയെ സമീപത്തെ ആശുപത്രിയിൽ പ്രവേശിപ്പിച്ചു. എന്നാൽ പരിക്ക് ഗുരുതരമായതിനാൽ പിന്നീട് യുവതിയെ ഡൽഹിയിലെ സഫ്ദർജംഗ് ആശുപത്രിയിലേക്ക് മാറ്റി.

അടിയന്തര ശസ്ത്രക്രിയയ്ക്കു വിധേയമാക്കിയ യുവതിയുടെ ആരോഗ്യനില തൃപ്തികരമാണെന്ന് ആശുപത്രി വൃത്തങ്ങൾ അറിയിച്ചു. എന്നാൽ കഴുത്തിന് കുത്തേറ്റതിനെ തുടർന്ന് യുവതിയുടെ സംസാരശേഷി നഷ്ടമായതായി ഡോക്ടർമാർ അറിയിച്ചു. എന്നാൽ ചികിത്സയിലൂടെ ഇത് വീണ്ടെടുക്കാമെന്നാണ് ഡോക്ടർമാർ പറയുന്നത്.

പ്രതിക്കെതിരെ വധശ്രമം ഉൾപ്പടെ ജാമ്യമില്ലാ വകുപ്പുകളാണ് ചുമത്തിയിരിക്കുന്നതെന്ന് പൊലീസ് അറിയിച്ചു. കോടതിയിൽ ഹാജരാക്കിയ ശേഷം പ്രതിയെ ജുഡീഷ്യൽ കസ്റ്റഡിയിൽ വിട്ടു.