മദ്യം വീട്ടിൽ എത്തിക്കാമെന്ന് പറഞ്ഞ് ഓൺലൈൻ വഴി പണം തട്ടൽ; വഞ്ചിതരാകാതിരിക്കാൻ ശ്രദ്ധിക്കൂ

കൊൽക്കത്ത: വീടുകളിൽ മദ്യം എത്തിക്കാമെന്ന് പറഞ്ഞ് ഓൺലൈൻ വഴി പണം തട്ടുന്നതായി പരാതി. ലോക്ക് ഡൗണിനെ തുടർന്ന് സംസ്ഥാനങ്ങൾ മദ്യ വിൽപ്പനയ്ക്ക് നിരോധനം ഏർപ്പെടുത്തിയതോടെയാണ് ഇത്തരം തട്ടിപ്പ് സംഘങ്ങൾ സജീവമായത്.

ഇഷ്ട ബ്രാൻഡിലുള്ള മദ്യം വീടുകളിൽ എത്തിക്കാമെന്ന് വാഗ്ദാനം ചെയ്താണ് പണം തട്ടുന്നത്. വിളിക്കുന്നയാൾ ബാങ്ക് വിവരങ്ങളടക്കം ആവശ്യപ്പെടും. ഒരു മണിക്കൂറിനുള്ളിൽ മദ്യം എത്തിക്കുമെന്ന വാഗ്ദാനവും നൽകും.

ഇത്തരത്തിൽ നിരവധി കേസുകളാണ് കൊൽക്കത്ത സൈബർ സെല്ലിനു ലഭിച്ചിരിക്കുന്നത്. കോവിഡ് ലോക്ക് ഡൗണിനെ തുടർന്ന് മദ്യം ലഭിക്കാതായതോടെ പലരും മദ്യത്തിനായുള്ള കാത്തിരിപ്പിലാണ്.

അതുകൊണ്ട് ഫോൺവിളി എത്തുന്നതോടെ രണ്ടാമതൊന്ന് ചിന്തിക്കാതെ പലരും ബാങ്ക് വിവരങ്ങള്‍ കൈമാറുകയായിരുന്നു. ബാങ്ക് വിവരങ്ങൾ കൈമാറുന്ന അടുത്ത നിമിഷം പണം നഷ്ടമാകും. എന്നാൽ വാഗ്ദാനം ചെയ്യുന്നതുപോലെ മദ്യം വീടുകളിലെത്തില്ല.

ചുരുങ്ങിയ ദിവസത്തിനുള്ളിൽ നിരവധി പേരാണ് തട്ടിപ്പിനിരയായിരിക്കുന്നത്. പരാതിയുടെ അടിസ്ഥാനത്തിൽ നടത്തിയ അന്വേഷണത്തിൽ ജാർഖണ്ഡിലെ ജമാത്രാ ഗ്രാമത്തിലെ റാക്കറ്റാണ് തട്ടിപ്പിന് പിന്നിലെന്ന് കണ്ടെത്തി. ഇതുവരെ രണ്ടര ലക്ഷത്തോളം രൂപയാണ് സംഘം തട്ടിയെടുത്തിരിക്കുന്നത്.

ഫേസ്ബുക്ക് പരസ്യം വഴി ഫോൺ നമ്പർ നൽകിയാണ് തട്ടിപ്പ്. ആവശ്യക്കാർ ഈ നമ്പറിലേക്ക് വിളിക്കുന്നതോടെ അവരുടെ ക്രെഡിറ്റ് കാർഡ് വിവരങ്ങൾ സംഘം ആവശ്യപ്പെടും. ഇതിലൂടെയാണ് പണം തട്ടുന്നത്. സംഘത്തെ കുറിച്ചുള്ള വ്യക്തമായ വിവരങ്ങൾ ലഭിച്ചു. ഉടൻ അറസ്റ്റ് ചെയ്യും- കൊൽക്കത്ത പൊലീസ് ന്യൂസ് 18നോട് പറഞ്ഞു.